جنوبی کوریا کے ساتھ اقتصادی و دفاعی تعلقات میں اضافہ ہو رہا ہے:ٹرمپ

امریکی صدر ڈونلڈ ٹرمپ نے اعلان کیا ہے کہ جنوبی کوریا نے امریکہ کے ساتھ وسیع پیمانے پر اقتصادی اور دفاعی پیکج پر اتفاق کیا ہے۔

انہوں نے جمعرات کو اپنے ٹروتھ سوشل پلیٹ فارم پر کہا  کہ جنوبی کوریا نے امریکہ کی طرف سے ان کے خلاف عائد محصولات میں کمی کے لئے امریکہ کو 350  ارب  ڈالر ادا کرنے پر اتفاق کیا ہے۔"

اس کے علاوہ انہوں نے کہا کہ جنوبی کوریا نے امریکہ سے  تیل اور گیس کی بڑی مقدار خریدنے پر اتفاق کیا ہے  جس کے  ساتھ ہی  جنوبی کوریا کی کمپنیوں اور تاجروں کی جانب سے امریکہ میں سرمایہ کاری 600 ارب ڈالر سے تجاوز کر جائے گی۔

انہوں نے مزید کہا  کہ ہمارا فوجی اتحاد پہلے سے کہیں زیادہ مضبوط ہے اور اس کی بنیاد پر  میں نے انہیں پرانے زمانے کی  اور بہت کم رفتار ڈیزل سے چلنے والی آبدوزوں کے بجائے جوہری توانائی سے چلنے والی آبدوز بنانے کی منظوری دی ہے۔

گزشتہ  روز  جنوبی کوریا میں صدر لی جے میونگ سے ملاقات کے دوران  ٹرمپ نے کہا کہ جنوبی کوریا کے ساتھ ایک غیر معمولی تجارتی معاہدے کو کافی حد تک حتمی شکل دی گئی ہے ، لیکن یہ کہنے سے گریز کیا کہ رہنما حتمی معاہدے پر متفق ہوئے ہیں۔

 بعد ازاں جمعرات کو متوقع ہے کہ ٹرمپ اپنے چینی ہم منصب شی جن پنگ سے ملاقات کریں گے، جو ایشیا پیسیفک اکنامک کوآپریشن کے سربراہی اجلاس میں شرکت کے لیے جنوبی کوریا میں ہیں۔

 یہ بھی بتایا گیا ہے کہ  ٹرمپ علاقائی اجلاس میں شرکت نہیں کریں گے۔