چین اور بھارت "اچھے پڑوسی، دوست اور شراکت دار" ملک ہیں: شی

چین کے صدر شی جن پنگ نے بھارت کی صدر 'ڈروپدی مرمو'  کو یومِ جمہوریہ کی مبارکباد دی اور کہا ہے کہ چین اور بھارت "اچھے پڑوسی، دوست اور شراکت دار" ملک ہیں۔

چین کی سرکاری خبر ایجنسی شن خوا کی بروز سوموار شائع کردہ خبر کے مطابق صدرشی نے کہا ہے کہ چین اور بھارت "اچھے پڑوسی، دوست اور شراکت دار" ملک ہیں۔ گذشتہ سال کے دوران دونوں ممالک  کے باہمی تعلقات میں مسلسل بہتری اور ترقی ہوئی ہے اور یہ "عالمی امن و خوشحالی کے تحفظ اور فروغ کے لیے نہایت اہم بات ہے"۔

شی نے چین اور بھارت کو "اژدھے اور ہاتھی کے رقص سے تشبیہ دی اور  کہا ہے  کہ چین کا ہمیشہ سے یہ موقف رہا ہے کہ دونوں ممالک کے لیے "اچھے پڑوسی، دوست اور شراکت دار" ہونا ایک درست انتخاب ہے۔

انہوں نے امید ظاہر کی ہے  کہ دونوں فریق تبادلوں اور تعاون کو وسعت دیں گے اور باہمی خدشات کو دور کر کے صحت مند اور مستحکم تعلقات کو فروغ دیں گے۔

واضح رہے کہ جنوبی ایشیاء کے ایٹمی طاقت رکھنے والےدونوں  پڑوسیوں کے درمیان 3,800 کلومیٹر طویل لمبی لیکن غیر حتمی سرحد ہے جو 1950 کی دہائی سے متنازع رہی ہے۔

دونوں ممالک کے تعلقات 2020 کے ایک تصادم سے متاثر ہوئے تھے جس میں جھڑپوں  کے دوران 20 بھارتی اور چار چینی فوجی ہلاک ہو گئے تھے۔ اس کے بعد سے دونوں فریقوں نے ہمالیائی سرحد پر بڑے پیمانے پر فوجی نفری متعین کر رکھی ہے۔

دونوں ممالک نے گذشتہ سال سے کئی اعلیٰ سطحی باہمی دوروں کے بعد تعلقات بہتر کرنے کا سلسلہ شروع کیا ہے۔

امریکہ کے صدر ڈونلڈ ٹرمپ کی خارجہ پالیسی  کے پس منظر میں  دونوں ممالک نے 2025 میں دوبارہ  براہ راست پروازیں شروع کیں اور تجارت  اور سرمایہ کاری کے بہاؤ کو تیز کیا ۔