"آبنائے ہرمز میں جہازوں کی آمدورفت کم رہی

کم از کم دو امریکی پابندیوں کا شکار جہاز، جو ایران سے منسلک ہیں، ایران کے لارک اور قشم جزیروں کے قریب  بظاہر   ایک نئے راستے سے خلیج میں داخل ہوئے۔

 یہ بھی بتایا گیا ہے کہ  آبنائے ہرمز  میں آمدورفت امریکی ناکہ بندی کے تیسرے دن کے دوران نمایاں طور پر کم رہی۔

جہازوں کی نگرانی کے ڈیٹا سے ظاہر ہوا کہ مائع پٹرولیم گیس لے جانے والا جہاز جی سمر اور دیوہیکل خام تیل بردار ہانگ لو، جسے آر ایچ این بھی کہا جاتا ہے، متحدہ عرب امارات سے آنے کے بعد خلیج میں داخل ہوئے۔

جی سمر، جو خالی سفر کر رہا تھا چینی ملکیت اور عملے کی تفصیلات نشر کر رہا تھا ،ہانگ لو بھی خالی تھا جو ایران  سے مبینہ تعلقات کے باعث واشنگٹن کی پابندیوں کا شکار ہے، اور وہ  کچھ ہی دیر بعد اس کے پیچھے آیا۔ یہ ٹینکر، جو 20 لاکھ بیرل تک خام تیل لے جا سکتا ہے، بعد میں ایران کے ساحل کے ساتھ مغرب کی جانب سفر کرتا دیکھا گیا جبکہ اس نے اشارہ دیا کہ وہ احکامات کا انتظار کر رہا ہے۔

بلک کیریئر روزالینا بھی اس سے پہلے اسی راستے پر جاتا ہوا دکھائی دیاجس نے اشارہ دیا کہ وہ خوراک کے سامان کے ساتھ ایک ایرانی بندرگاہ کی طرف جا رہا ہے۔

باہر جانے والی ٹریفک بھی محدود شکل میں جاری رہی۔ ایران سے منسلک دو کنٹینر جہاز، گولبون اور کاشان بدھ کے روز خلیج سے نکلتے ہوئے بھی دیکھے گئے۔

ایک چھوٹا پروڈکٹ ٹینکر، نوبلراسی دن مشرق کی جانب خلیج عمان میں داخل ہوا۔

مسلسل نقل و حرکت کے باوجود، ہرمز سے گزرنے والی ٹریفک بہت کم ہو کر رہ گئی ہے۔

کوئی بھی مکمل طور پر بھرا ہوا ایرانی خام تیل بردار ٹینکر آبنائے سے نکلتا ہوا نہیں دیکھا گیا، جس سے جنگی حالات میں روزانہ تقریباً 17 لاکھ بیرل برآمدات کے بہاؤ کو خطرہ لاحق ہو گیا ہے، اگرچہ الیکٹرانک مداخلت اور "ڈارک فلیٹ" کی سرگرمیاں کچھ گزرگاہوں کو چھپا سکتی ہیں۔

امریکی سینٹرل کمانڈ نے بدھ کے روز کہا کہ کوئی بھی جہاز اس کی ناکہ بندی سے نہیں گزرا اور نو جہازوں نے احکامات پر عمل کرتے ہوئے ایران کی طرف واپس جانے کا رخ کیا۔

دوسری جانب، ایران نے کہا کہ اس کے ایک تیل بردار سپر ٹینکر نے ناکہ بندی توڑ دی ہے۔

جہاز کا نام نہیں بتایا گیا لیکن ممکن ہے کہ اس سے مراد پابندیوں کا شکار ٹینکر ایلیشیا ہو جس کے بارے میں جہازوں کی نگرانی کے ڈیٹا نے دکھایا کہ وہ بدھ کے روز خلیج میں داخل ہوا۔