اسرائیلی فوج نے غزہ کے علاقے رفح میں پانچ فلسطینیوں کو شہید کر دیا

اسرائیلی فوج کا کہنا ہے کہ اس نے پانچ فلسطینیوں کو ہلاک کر دیا ہے اور دعویٰ کیا ہے کہ وہ جنوبی غزہ کے شہر رفح میں ایک سرنگ سے نکلے تھے، یہ وہ علاقہ ہے جو جنگ بندی معاہدے کے تحت اسرائیل کے قبضے میں ہے۔

جمعہ کے روز جاری کیے گئے ایک بیان میں فوج نے کہا کہ نہال بریگیڈ کے لڑاکا دستے کی فورسز نے غزہ کے جنوب میں رفح کے مشرقی حصے میں زیرِ زمین انفراسٹرکچر سے نکلتے ہوئے پانچ مسلح افراد کا تعین کیا۔

رفح شہر اُن علاقوں میں آتا ہے جو جنگ بندی معاہدے کے مطابق عام طور پر ’یلو لائن‘ کے مشرق میں اسرائیلی فوج کے قبضے میں ہیں؛ یہ معاہدہ 10 اکتوبر کو نافذ ہوا تھا۔

کئی روز سے اسرائیلی میڈیا کے مطابق حماس کے قریب 200 جنگجو رفح میں ایک سرنگ میں پھنسے ہوئے ہیں اور تا حال تل ابیب نے فلسطینی مزاحمتی گروپ اور ثالثین کی جانب سے ان کو غزہ کے اُن علاقوں تک محفوظ رسائی فراہم کرنے کی درخواستوں کا کوئی جواب نہیں دیا۔

اکتوبر 2023 سے اسرائیلی فوج نے غزہ میں تقریباً 70,000 افراد کو ہلاک کیا ہے، جن میں زیادہ تر خواتین اور بچے شامل ہیں؛ 170,800 سے زائد افراد زخمی ہوئے اور اس علاقے کو ملبے کا ڈھیر بنا دیا گیا ہے۔