جاپان: 7،4 کی شدت سے زلزلہ، سونامی کی وارننگ

جاپان میں، پیر کی شام 7.4 شدت  سے آنے والے  زلزلے کے بعد ملک کے شمالی اور شمال مشرقی حصوں میں سونامی کی لہریں دیکھی گئی ہیں۔

امریکی جیولوجیکل سروے (USGS) کے مطابق، گرین وچ ٹائم (GMT) کے مطابق زلزلہ شام 07:52 پر آیا۔  اس  کا مرکز صوبہ ایواتے کے شہر میاکو  سے تقریباً 114 کلومیٹر دور سمندر میں تھا۔

جاپانی حکومت نے زلزلے کی شدت 7.5 ریکارڈ کی ہے اور ہوکائیڈو، اوموری اور ایواتے کے علاقوں میں بحر الکاہل کے ساحلی پٹی پر سونامی کی وارننگ جاری کر دی ہے۔

حکومت کی جانب سے جاری کردہ ایک نوٹس میں کہا گیا ہے کہ"ساحلی یا دریا کے قریبی علاقوں میں موجود افراد فوری طور پر اونچی جگہوں اور محفوظ علاقوں کی طرف منتقل ہو جائیں۔"

کیوڈو نیوز کے مطابق، بحر الکاہل میں صوبہ ایواتے اور اوموری کے ساحلوں پر سونامی کی لہریں دیکھی گئی ہیں۔

حکام نے خبردار کیا ہے کہ سونامی کی لہریں تین میٹر تک بلند ہو سکتی ہیں۔ انہوں نے یہ بھی واضح کیا ہے کہ اوموری اور میاگی کے صوبوں میں واقع جوہری بجلی گھروں میں "کسی قسم کی غیر معمولی صورتحال کی اطلاع نہیں ملی"۔

زلزلے کے بعد دارالحکومت ٹوکیو اور صوبہ اوموری کے درمیان چلنے والی تیز رفتار ٹرین (بلٹ ٹرین) کی سروس معطل کر دی گئی ہے۔

وزیراعظم سنائے تاکایچی نے متاثرہ علاقوں کے شہریوں پر زور دیا ہے کہ وہ ممکنہ سونامی کے پیش نظر "اونچی جگہوں پر چلے جائیں"۔

زلزلے کی وجہ سے کسی بڑے جانی یا مالی نقصان کی تاحال کوئی اطلاع موصول نہیں ہوئی ہے۔