پاکستان کے صوبہ خیبر پختونخوا کے ضلع بنّوں میں ایک پولیس اسٹیشن کے داخلی حصّے  کے قریب  موٹر سائیکل پر نصب دھماکہ خیز مواد پھٹنے کے نتیجے میں ایک بچے سمیت دو افراد ہلاک اور متعدد زخمی ہوگئے ہیں۔

پولیس اور امدادی حکام کے مطابق آج بروز سوموار کئے گئے اس دھماکے سے قریبی دکانوں کو بھی نقصان پہنچا ہے۔

مقامی پولیس افسر فدا محمد نے کہا ہے کہ یہ حملہ افغانستان کے ساتھ سرحدی صوبے خیبر پختونخوا کے ضلع  بنوں میں ہوا ہے۔ انہوں نے مزید تفصیلات فراہم کرنے سے گریز کیا اور صرف اتنا کہا ہے کہ ہلاک اور زخمی افراد کو قریبی ہسپتال پہنچا دیا گیا ہے۔

تاحال کسی گروپ نے حملے کی  ذمہ داری قبول نہیں کی۔

واضح رہے کہ حالیہ برسوں میں پاکستان میں تشدد میں اضافہ دیکھا  جا رہا ہے۔ پاکستان حکومت اکثر دہشت گرد تنظیم تحریکِ طالبانِ پاکستان 'TTP' کو اس تشدد کا ذمہ دار ٹھہراتی  ہے۔