آسٹریلوی پولیس نے بونڈی بیچ میں فائرنگ کرنے والے افراد کی باپ اور بیٹے کے طور پر شناخت کی ہے

آسٹریلوی  پولیس نے کہا ہے کہ سڈنی کے بونڈی بیچ پر ہونے والی جان لیوا فائرنگ میں ملوث دو مشتبہ حملہ آور ایک باپ اور بیٹا تھے، اور تفتیش کار کسی اضافی مشتبہ کی تلاش نہیں کر رہے۔

نیو ساؤتھ ویلز کے پولیس کمشنر میل لینن نے پیر کو صحافیوں کو بتایا کہ حملہ آور 50 سالہ مرد اور اس کے 24 سالہ بیٹا تھے۔ باپ موقع پر ہلاک ہو گیا، جبکہ بیٹا اسپتال میں زیر علاج  ہے۔

لینن نے کہا ہم کسی اور مجرم کی تلاش نہیں کر رہے، ہم اس بات سے مطمئن ہیں کہ کل کے واقعے میں دو مجرم ملوث تھے۔

پولیس کا کہنا ہے کہ اتوار کے حملے میں کم از کم 16 افراد ہلاک ہوئے، جن میں 15 متاثرین اور ایک حملہ آور شامل ہے، اور تقریباً 40 دیگر زخمی ہوئے۔

لینن نے کہا کہ بڑے مشتبہ کے پاس آتشیں اسلحہ رکھنے کا لائسنس تھا اور اس کے نام پر چھ رجسٹرڈ ہتھیار تھے۔ پولیس نے واقعہ کی جگہ سے اور رات بھر کی تلاشی کے دوران بونیرِگ اور کیمپسی کے مضافات میں دو جائیدادوں سے کل چھ فائرنگ ہتھیار برآمد کیے۔ بالیسٹکس اور فرانزک ٹیسٹ جاری ہیں تاکہ اس بات کی تصدیق ہو سکے کہ ضبط شدہ ہتھیار وہی تھے جو حملے میں استعمال ہوئے۔

عوامی نشریاتی ادارے اے بی سی نے اطلاع دی ہے کہ  پولیس نے ایک حملہ آور کی گاڑی سے بارودی مواد  بھی برآمد کیا ہے۔

ایک حقیقی ہیرو

وزیراعظم انتھونی البانیز نے حملے کی مذمت کی اور واقعے کو 'دہشت گردی' قرار دیا۔

یہ یہودی آسٹریلویوں کو ہدف بنانے والا  ہنوکا کے پہلے دن  کاحملہ ہے۔ البانیز نے کہا ، ہمارے ملک میں اس نفرت، تشدد اور دہشت گردی کی کوئی جگہ نہیں۔

حکام نے اس واقعے کے دوران مداخلت کرنے والے ایک تماشائی کی بھی تعریف کی۔ اس شخص کی شناخت 43 سالہ احمد الا احمد کے طور پر کی گئی، جس کو فوٹیج میں  ایک حملہ آور کی طرف دوڑتے ہوئے اور اس کا ہتھیار چھینتے ہوئے دکھایا گیا ہے ، جس کی وجہ سے حملہ آور پیچھے ہٹ گیا۔

احمد الااحمد، جو ایک پھلوں کی دکان کے مالک اور دو بچوں کے والد ہیں، کا  بازو اور ہاتھ پر گولی لگنے کے بعد علاج معالجہ جاری ہے، وہ اب بھی اسپتال میں ہیں۔

نیو ساؤتھ ویلز کے وزیرِ اعلیٰ کرس منز نے احمد الا احمد کے اقدام  کو ایک بہادرانہ فعل قرار دیا۔

منز نے کہا کہ ایک آدمی جو کمیونٹی پر فائرنگ کرنے والے ایک حملہ آور کی طرف بڑھا اور اکیلے ہی اسے بے ہتھیار کر دیا،  اس نے اپنی جان کو خطرے میں ڈال کر بے شمار لوگوں کی جانیں بچائیں، وہ شخص واقعی ایک حقیقی ہیرو ہے۔