روسی ٹیلی گرام چینلز نے پیر کے روز اطلاع دی ہے کہ یوکرینی ڈرونز نے رات گئے روس کے دارالحکومت ماسکو کے علاقے کو نشانہ بناتے ہوئے ایک تیل کے ڈپو اور ایک لاجسٹک تنصیب پر حملہ کیا ہے۔

سوشل میڈیا پر گردش کرنے والی تصاویر اور ویڈیوز میں کریملن سے تقریباً 40 کلومیٹر جنوب میں واقع شہر پوڈولسک  کے اوپر، تیل ذخیرہ کرنے والی ایک تنصیب پر حملے کے بعد اٹھنے والا شدید سیاہ دھواں واضح طور پر دیکھا جا سکتا ہے۔

ماسکو کے میئر سرگئی سوبیانین  نے بتایا کہ رات کے وقت ماسکو کے علاقے کو 400 سے زائد ڈرونز نے نشانہ بنایا اور فضائی دفاعی نظام نے ان میں سے زیادہ تر کو روک دیا۔

سوبیانین نے سرکاری سرپرستی میں چلنے والے میکس  پلیٹ فارم پر لکھا:کہ "دشمن کے 400 سے زیادہ ڈرونز نے شام سے صبح تک ماسکو کے علاقے کی طرف پرواز کی۔ ان میں سے بیشتر کو فضائی دفاعی فورسز نے دور ہی بے اثر کر دیا۔ 85 ڈرونز ماسکو کے قریب پہنچتے ہوئے تباہ کیے گئے۔"

حالیہ مہینوں میں روسی سرزمین پر اپنے حملوں تیز کرنے والے کیف  نے انہیں چار سال سے زیادہ عرصے سے جاری روسی حملوں کا جوابی عمل قرار دیا ہے۔

مزید برآں، روس کی سرکاری خبر رساں ایجنسی تاس  نے رپورٹ کیا ہے کہ ماسکو کے علاقے میں دھماکے کے نتیجے میں تین غیر ملکی شہریوں سمیت چھ افراد زخمی ہو کر ہسپتال منتقل ہوئے ہیں۔ ہسپتال کے بیان میں کہا گیا ہے کہ"مختلف نوعیت کے دھماکے سے لگنے والے زخموں کے ساتھ چھ افراد کو Domodedovo ہسپتال لایا گیا جن میں سے تین غیر ملکی شہری ہیں تاہم، یہ واضح نہیں ہے کہ آیا ان زخموں کا تعلق ڈرون حملوں سے ہے یا نہیں۔

ماسکو کے جنوب میں واقع دومودیدوو میں ایک بین الاقوامی ہوائی اڈہ بھی موجود ہے۔

دوسری طرف، کولیڈینو  میں روس کے سب سے بڑے آن لائن ریٹیلر وائلڈ بیریز کے ایک گودام میں بھی آگ لگنے کی اطلاع ملی ہے۔

 دعویٰ کیا گیا ہے کہ کمپنی کے تقسیمی مراکز میں سے ایک کو نشانہ بنایا گیا ہے اس کے علاوہ دومودیدوو میں ایک رہائشی عمارت میں بھی آگ لگ گئی جس کے بارے میں بتایا گیا ہے کہ یہ ڈرون حملے کا واقعہ ہے۔

نقصان کی صحیح حد کا ابھی علم نہیں ہو سکا اور یوکرینی فوج نے ان دعووں پر کوئی تبصرہ نہیں کیا ہے۔