مقامی میڈیا نے رپورٹ کیا ہے کہ جنوبی آسٹریلیا کے حکام نے بدھ کو کہا ہےکہ ریاست میں مزید 11 مشتبہ کیسز کی نشاندہی کے بعد H5 نسل کے برڈ فلو کے مقامی طور پر پھیلنے کا "بہت زیادہ امکان" ہے۔
آسٹریلی ٹی وی نے رپورٹ کیا کہ ان میں سے سات کیسز ریاست کے جنوب مشرق میں اور چار کینگارو جزیرے پر پائے گئے۔
جب کہ حکام ابھی حتمی ٹیسٹنگ کے نتائج کے منتظر ہیں، جنوبی آسٹریلیا کی وزیر برائے پرائمری انڈسٹریز کلیئر سکریون نے کہا کہ اس وائرس کے "مقامی پھیلاؤ" کا قوی امکان ہے۔
ریاستی حکومت کو امید ہے کہ بیماری کے جنگلی پرندوں کے درمیان مقامی طور پر پھیلنے کی تصدیق کے لیے کامن ویلتھ سائنسی اور صنعتی تحقیقاتی ادارےکے لیب ٹیسٹ کے نتائج بدھ یا جمعرات تک آ جائیں گے۔
سکریون نے کہا، " ہم نے مشاہدہ کیا ہے کہ ہم دنیا بھر میں H5 برڈ فلو کو روک نہیں سکتے، اور دنیا کے ہر دوسرے براعظم میں بلاشبہ مقامی طور پر منتقلی ہوئی ہے۔"
سکریون نے کہا کہ ریاست یا ملک کے دیگر حصوں میں پولٹری فارمز میں H5 برڈ فلو کی کوئی نشاندہی نہیں ہوئی۔
