ایران نے امریکی صدر ٹرمپ کی جانب سے مذاکرات کے مطالبے پر سخت تنقید کرتے ہوئے کہا ہے کہ واشنگٹن کی جانب سے دہشت گردی کے دعوے بے بنیاد ہیں۔

مصر کے شہر شرم الشیخ میں ہونے والے بین الاقوامی امن اجلاس میں شرکت سے قبل پیر کو اسرائیلی کنیسٹ سے خطاب کرتے ہوئے ٹرمپ نے کہا کہ ایران کے رہنماؤں کے لیے اس سے زیادہ کوئی فائدہ نہیں ہو سکتا کہ وہ دہشت گردوں  سے چھٹکارا   پائیں، اپنے ہمسایوں کو دھمکیاں دینا بند کریں، اپنے عسکریت پسند آلہ کاروں کی مالی اعانت بند کریں اور اسرائیل کے وجود کے حق کو تسلیم کریں۔

ٹرمپ نے یہ بھی کہا کہ ایران امریکہ کے ساتھ امن معاہدہ کرنا چاہتا ہے "چاہے وہ یہ کیوں نہ کہے کہ 'ہم کوئی معاہدہ نہیں کرنا چاہتے'۔

ایران کی سرکاری خبر رساں ایجنسی ایرنا کی جانب سے جاری ہونے والے ایک بیان میں کہا گیا ہے کہ امریکہ ،دنیا میں دہشت گردی کا سب سے بڑا محرک اور دہشت گرد اور نسل کشی کرنے والی صہیونی حکومت کے حامی ہونے کے ناطے دوسروں پر الزام لگانے کا کوئی اخلاقی اختیار نہیں رکھتا۔

 ایران کی وزارت نے کہا ہے کہ ایران کے پرامن جوہری پروگرام کے بارے میں جھوٹے دعووں کا اعادہ کسی بھی طرح سے امریکہ اور صہیونی حکومت کے مشترکہ جرائم کا جواز نہیں دے سکتا۔

 یاد رہے کہ اسرائیل نے 13 جون کو تہران پر اچانک حملہ کیا تھا جس میں فوجی، جوہری اور سویلین تنصیبات کے ساتھ ساتھ سینئر فوجی کمانڈروں اور جوہری سائنسدانوں کو بھی نشانہ بنایا گیا تھا۔

تہران نے جوابی میزائل اور ڈرون حملے کیے جبکہ امریکہ نے ایران کی تین جوہری تنصیبات پر بمباری کی تھی ۔

 12 روزہ تنازعہ امریکی سرپرستی میں جنگ بندی کے بعد رک گیا تھا جو 24 جون کو نافذ العمل تھا۔

 'بین الاقوامی انصاف میں رکاوٹ'

 وزارت نے واشنگٹن کو اسرائیل کے "استثنیٰ میں" کردار کے لئے جوابدہ ٹھہرانے کا مطالبہ کیا ، "بشمول اقوام متحدہ کی سلامتی کونسل میں اسرائیل کے خلاف کسی بھی موثر کارروائی کو روکنا اور اسرائیلی مجرموں کے خلاف مقدمہ چلانے کے مقصد سے بین الاقوامی عدالتی عمل میں رکاوٹ ڈالنا۔"

اکتوبر 2023 کے بعد سے، اسرائیلی حملوں میں غزہ میں 67,800 سے زیادہ فلسطینی ہلاک ہو چکے ہیں، جن میں زیادہ تر خواتین اور بچے ہیں، جس سے یہ علاقہ بڑی حد تک ناقابل رہائش رہ گیا ہے۔

اسرائیل اور حماس کے درمیان جنگ بندی کے معاہدے کا پہلا مرحلہ جمعے کو نافذ العمل ہو گیا ہے۔