ترکیہ کے نائب صدر جیوَدت یلماز نے کہا ہے کہ ترکیہ اور شمالی قبرصی ترک جمہوریہ تعاون کو آگے بڑھائیں گے اور مارچ کے آخر تک ایک نئے اقتصادی معاہدے کو حتمی شکل دے دیں گے۔
انقرہ میں شمالی قبرصی ترک جمہوریہ کے وزیراعظم اُنال اُسطُل سے ملاقات کے بعد یلماز نے جمعرات کو گفتگو کو مثمر قرار دیا اور کہا کہ ایک نئے اقتصادی اور مالیاتی تعاون کے فریم ورک پر کام جاری ہے۔
یلماز نے کہا کہ"ہمارا ہدف واضح ہے۔ ہم شمالی قبرصی ترک جمہوریہ کو زیادہ خوشحال اور مضبوط مستقبل کی طرف لے جانے کے خواہاں ہیں۔"
انہوں نے زور دیا کہ ترکیہ اور شمالی قبرصی ترک جمہوریہ کے درمیان تعلقات "دو ممالک کے عام تعلقات نہیں اور ترکی بطور ضامن ریاست شمالی قبرصی ترک جمہوریہ کے ساتھ کھڑا رہے گا۔"
یلماز نے کہا کہ موجودہ تعاون پروٹوکول مؤثر انداز میں نافذ کیا گیا ہے اور دونوں فریقین کا ہدف ہے کہ مارچ کے آخر تک نئے معاہدے پر مذاکرات مکمل کر لیے جائیں۔
مسئلہ قبرص پر انہوں نے کہا کہ کسی بھی حل کی بنیاد "جزیرے کے حقائق" پر ہونی چاہیے، جس میں "دو ریاستیں اور دو اقوام" اور خودمختاری کی مساوات شامل ہیں۔
نائب صدر نے کہا کہ"ترکیہ اور شمالی قبرصی ترک جمہوریہ تعاون کے جذبے کے ساتھ اپنا راستہ جاری رکھیں گے"، ہمارے خطے میں جو کوئی بھی چال چلنے کی کوشش کرے گا، خطے کے حقائق انہیں ناکارہ ثابت کر دیں گے۔
ملاقات کے بعد شمالی قبرصی ترک جمہوریہ کے وزیراعظم اُنال اُسطُل نے حالیہ علاقائی پیش رفت پر بھی بات کی اور اس حوالے سے یونان، اسرائیل اور جنوبی قبرص کی یونانی انتظامیہ کے درمیان دستخط شدہ دفاعی پروٹوکول کا حوالہ دیا۔
انہوں نے کہا کہ دفاعی معاہدے پر دستخط کے بعد یونان، اسرائیل اور یونانی انتظامیہ نے اسلحہ سازی کی دوڑ کی جانب قدم رکھا ہے اور الزام لگایا کہ وہ میڈیا میں اپنی نئی دفاعی خریداریوں کا مظاہرہ کر رہے ہیں۔
انہوں نے کہا کہ قبرصی ترک"اکیلے نہیں" اور زور دیا کہ جمہوریہ ترکیہ مادر وطن کے طور پر شمالی قبرصی ترک جمہوریہ کے شانہ بشانہ ہے۔
اُنال اُسطُل نے تین طرفہ دفاعی تعاون کا حوالہ دیتے ہوئے کہا کہ" وہ جو بھی کریں، ہمیں اس بات کا کوئی شک نہیں کہ جب وقت آئے گا تو ہم اسی طرح اور اسی عزم کے ساتھ جواب دیں گے۔"
انہوں نے یہ بھی دہرایا کہ جزیرے پر دو قومیں اور دو ریاستیں موجود لہذا کسی بھی حل میں اس حقیقت کی عکاسی ہونی چاہیے۔
