ترک سرکاری حالق بینک اور امریکی محکمہ انصاف کے درمیان ایک "معاہدہ "طے پا گیا ہے، جو جاری قانونی کشمکش کو ختم کرنے کی راہ ہموار کر سکتا ہے۔
نیویارک کے جنوبی ضلع کے امریکی اٹارنی جے کلےٹن نے امریکی ڈسٹرکٹ کورٹ کے جج رچرڈ برمین کو لکھے گئے خط میں کہا کہ محکمہ انصاف "اس بات پر یقین رکھتا ہے کہ اس معاہدے میں طے شدہ شرائط و ضوابط کے تحت حالق بینک کے خلاف الزامات کا حل ریاستِ متحدہ کے بہترین مفاد میں ہے۔"
کلےٹن نے لکھا "حالق بینک کا یہ معاہدہ دہشت گردی کی مالی اعانت اور ایران کی حکومت کو مالی معاونت کے خلاف امریکہ کے اہم مفادات کو آگے بڑھاتا ہے۔"
انہوں نے مزید کہا کہ"یہ معاہدہ عوامی مفاد کے مطابق ہے۔ جس سے حاصل ہونے والے قومی سلامتی اور خارجہ پالیسی کے مفادات منفرد اور غیر معمولی ہیں، اور ترکیہ کی سفارتی کوششوں کا حوالہ دیا جو غزہ میں اسرائیلی یرغمالیوں کی رہائی اور 2025 میں جنگ زدہ فلسطینی علاقے میں جنگ بندی کی سہولت فراہم کرنے میں معاون ثابت ہوئیں۔
محکمہ انصاف کے مطابق معاہدے کے تحت حالق بینک ایک تیسری پارٹی کے ساتھ مل کر اپنے پابندیوں اور منی لانڈرنگ کے خلاف تعمیل کے اقدامات کا جائزہ لے گا۔
کلےٹن نے لکھا ہے کہ بعد ازاں ایک رپورٹ محکمہ خزانہ کے دفتر برائے غیر ملکی اثاثے کنٹرول اور امریکی اٹارنی کے دفتر کو جمع کروائی جائے گی، تاکہ کیس کے الزامات کے تحت کیے گئے عمل میں ترمیم کی جا سکے۔
معاہدے کو عدالت کی منظوری درکار ہو گی، اور جج برمین نے کہا کہ یہ معاملہ بدھ کو پہلے سے طے شدہ سماعت کے دوران زیرِ بحث آئے گا۔
کوئی غلط کاروائی نہیں اور نہ ہی جرمانہ
ترکیہ کے عوامی انکشاف پلیٹ فارم (KAP) پر شائع ایک بیان میں حالق بینک نے کہا کہ نیویارک کے جنوبی ضلع کے امریکی اٹارنی آفس کے ساتھ طے شدہ سمجھوتے کے تحت بینک کسی بھی فوجداری غلط اقدام کا اعتراف نہیں کرے گا اور نہ ہی انتظامی جرمانے ادا کرے گا۔
بیان میں کہا گیا کہ معاہدہ ایک ماہر فرم سے تقاضا کرتا ہے کہ وہ OFAC کو ایک تعمیل رپورٹ جمع کروائے، جس کی ایک کاپی پراسیکیوٹرز کو فراہم کی جائے گی۔ اس کے بعدحالق بینک اور امریکی اٹارنی دفتر مشترکہ طور پر نیویارک کے جنوبی ضلع کی وفاقی عدالت میں کیس خارج کرنے کی درخواست کریں گے۔
جب عدالت اس خارج کرنے کی منظوری دے دے گی تو امریکہ میں بینک کے خلاف تقریباً نو سال سے جاری فوجداری کارروائی مکمل طور پر ختم ہو جائے گی۔
غیر ملکی اثاثہ جات کے دفتر نے بھی بینک کو مطلع کیا ہے کہ وہ اپنا انتظامی جائزہ بغیر کسی مزید کارروائی کے بند کر رہا ہے۔
حالق بینک نے کہا کہ یہ سمجھوتہ بین الاقوامی فنڈنگ، متعلقہ بینکنگ نیٹ ورکس اور عالمی منڈیوں تک رسائی بہتر کر کے اس کی مالی حیثیت کو مضبوط کرے گا۔
بیان میں کہا گیا ہے کہ"ہم 88 سالوں سے اپنی قوم کی معاش اعانت کر رہے ہیں۔ ہمارا بینک مستقبل میں بھی ماضی کی طرح مقامی اور بین الاقوامی ضوابط کی پاسداری کرتے ہوئے مضبوط، قابلِ اعتماد اور بلامشکل انداز میں اپنی سرگرمیاں جاری رکھے گا اور بینکنگ شعبے اور ہماری معیشت دونوں کی ترقی میں اپنا حصہ ڈالتا رہے گا۔
