یورپی یونین نے پیر کے روز کہا ہے کہ جنگ بندی کے معاہدے کی حمایت میں غزہ اور مصر کے درمیان رفح بارڈر کراسنگ کی نگرانی کے لیے بدھ کو سویلین مشن دوبارہ شروع کیا جائے گا۔

معاہدے کے ایک حصے کے طور پر حماس کی جانب سے اسرائیلی یرغمالیوں کے پہلے گروہ کو رہا کرنے کے بعد کاجا کالاس نے ایکس پر پوسٹ کیا  کہ یورپی یونین اپنا کردار ادا کرنے کے لئے تیار ہے۔

انہوں نے کہا کہ یہ مشن جنگ بندی کی حمایت میں اہم کردار ادا کر سکتا ہے۔

 27 ممالک پر مشتمل بلاک نے 2005 میں رفح کراسنگ کی نگرانی میں مدد کے لیے ایک سویلین مشن قائم کیا تھا، لیکن دو سال بعد مزاحمتی گروپ حماس کی جانب سے غزہ پر قبضہ کرنے کے بعد اسے معطل کر دیا گیا تھا۔

ای یو بی اے ایم مانیٹرنگ مشن کا مقصد کلیدی کراسنگ پر غیر جانبدار ، تیسرے فریق کی موجودگی فراہم کرنا ہے اور اس میں اٹلی ، اسپین اور فرانس کی پولیس شامل ہے۔

جنوری میں اسے مختصر طور پر دوبارہ تعینات کیا گیا تھا لیکن مارچ میں دوبارہ معطل کردیا گیا تھا۔

پیر کو یرغمالیوں کی رہائی کا خیرمقدم کرتے ہوئے ، کالاس نے "امن کی طرف اس اہم سنگ میل میں امریکی صدر ڈونلڈ ٹرمپ کے کردار پر روشنی ڈالتے ہوئے کہا کہ رہنما نے "اس پیش رفت کو ممکن بنایا"۔

یورپی کمیشن کی سربراہ ارسولا وان ڈیر لیین نے ایک علیحدہ بیان میں کہا کہ پیر کو شرم الشیخ میں غزہ کے سربراہی اجلاس میں جنگ کے خاتمے کے معاہدے کو حتمی شکل دینا ایک تاریخی سنگ میل ہوگا۔

انہوں نے لکھا کہ بلاک "امریکہ، قطر، مصر اور ترکیہ کی ثالثی میں بنائے گئے امن منصوبے کی مکمل حمایت کرتا ہے۔"

انہوں نے کہا  کہ ہم اپنے اختیار میں موجود تمام آلات کے ساتھ اس کی کامیابی میں اپنا حصہ ڈالنے کے لئے تیار ہیں۔"

شرم الشیخ میں یورپی یونین کی نمائندگی انتونیو کوسٹا کر رہے ہیں جو یورپی یونین کے رکن ممالک کی یورپی کونسل کے سربراہ ہیں۔