روس: فضائی دفاعی نظام نے ماسکو کی طرف آنے والے تین یوکرینی ڈرونز کو مار گرایا
روسی وزارت دفاع نے بتایا ہے کہ روسی افواج نے جنوبی علاقوں اور کریمیا میں تین گھنٹوں کے اندر 38 ڈرونز کو اتر گرایا اور تباہ کر دیا ہے۔
شہر کے میئر نے بتایا ہے کہ روسی فضائی دفاع نے ہفتے کی صبح ماسکو کی طرف بڑھنے والے تین یوکرینی ڈرونز کو مار گرایا، جبکہ مشرقی یوکرین کے دونیٹسک علاقے میں لڑائی شدت اختیار کر گئی ہے۔
ماسکو کے میئر سرگئی سوبیانین نے ٹیلیگرام پر کہا کہ گرائے گئے ڈرونز کے ملبے کا جائے وقوعہ پر معائنہ کیا جا رہا ہے۔
روسی وزارت دفاع نے بھی جنوبی علاقوں اور کریمیا میں تین گھنٹوں کے اندر 38 ڈرونز کو روکنے اور تباہ کرنے کی اطلاع دی۔
یوکرینی اسپیشل فورسز پوکرووسک میں تعینات
دریں اثنا، دو یوکرینی فوجی ذرائع نے مقامی میڈیا کو بتایا کہ کیف نے اس ہفتے کے اوائل میں پوکرووسک کے محاصرے میں گھرے شہر میں اسپیشل فورسز تعینات کیں، جہاں روسی افواج نے یوکرینی فوجیوں کو گھیرنے کا دعویٰ کیا ہے۔
رپورٹس کے مطابق، یہ ایلیٹ فورسز بلیک ہاک ہیلی کاپٹر کے ذریعے شدید روسی ڈرون نگرانی کے دوران پہنچیں، اور اس آپریشن کی نگرانی یوکرین کی فوجی انٹیلیجنس کے سربراہ کیریلو بدانوف نے کی۔ پوکرووسک، جو ایک اہم ٹرانسپورٹ مرکز ہے، روس کے دونیٹسک علاقے پر مکمل کنٹرول حاصل کرنے کی کوششوں کے دوران ایک بڑا محاذ بن چکا ہے۔
یوکرینی صدر وولودیمیر زیلنسکی نے اپنی رات کی تقریر میں اس معرکے کا حوالہ دیتے ہوئے کہا، ''ہم قابض کو تباہ کرتے رہیں گے۔ سب سے اہم بات یہ ہے کہ جہاں ممکن ہو روسی حملوں کو روکیں۔"