جنوبی افریقہ  کے شہر جوہانسبرگ کے علاقے کلیولینڈ میں مسلّح حملے کے نتیجے میں 12 افراد ہلاک  ہو گئے ہیں۔

جنوبی افریقہ کی پولیس نے  آج بروز بدھ جاری کردہ بیان میں کہا  ہے کہ منگل کی شام جوہانسبرگ کے مشرقی علاقے کلیولینڈ کی ایک کچی بستی میں مسلح افراد کی فائرنگ کے نتیجے میں  کم از کم 12 افراد ہلاک اور 9 زخمی ہو گئے ہیں۔

پولیس نے کہا  ہےکہ جمپرنامی اس کچی بستی پر حملے کے بعد 10 سے زائد مشتبہ افراد کی تلاش شروع کر دی گئی ہے۔مقتولین میں نو مرد اور تین عورتیں شامل ہیں۔ ان میں سے 11 موقع پر ہی ہلاک  ہو گئے تھے اور  12واں ہسپتال میں دم توڑ گیا ہے۔

حملے کا مقصد معلوم نہیں ہے۔

پولیس نے کہا ہے کہ مشتبہ افراد ایک سفید ٹویوٹا کوانٹم میں آئے، بستی میں دو  طرف سے  داخل ہوئے ، متعدد مقامات پر فائرنگ کی اور  اسی گاڑی میں سوار ہو کر فرار ہو گئے جس میں آئے تھے۔

واضح رہے کہ جنوبی افریقہ ، قتل کی وارداتوں   کے حوالے سے سرفہرست ممالک میں شامل ہے۔ یہاں یومیہ  اوسطاً ً 60 کے قریب قتل ہوتے ہیں۔