شہری دفاع  ٹیموں نے غزہ سٹی کے مغربی حصے میں ایک  گھر کے ملبے  تلے سے  ایک ہی کنبے  کے 30 فلسطینیوں کی لاشیں  بازیاب کی ہیں۔

سول ڈیفنس ایجنسی نے ایک بیان میں کہا کہ متاثرین سیلم خاندان کے رکن تھے، جو 19 دسمبر 2023 کو غزہ سٹی کے محلہ الریمال میں ان کے گھر پر ہونے والے ایک اسرائیلی فضائی حملے میں ہلاک ہوئے۔

سول ڈیفنس نے کہا کہ خیال کیا جاتا ہے کہ اس حملے میں خاندان کے تقریباً 60 افراد ہلاک ہوئے ہیں۔

تباہ شدہ گھر سول ڈیفنس کی ایک منظم مہم میں شامل پہلے مقامات میں سے تھا، جس کا آغاز غزہ بھر میں اسرائیل کی طرف سے تباہ کی گئی عمارتوں کے ملبے تلے   پھنسے ہزاروں فلسطینیوں کی تلاش کے لیے کیا گیا تھا۔

ایجنسی نے کہا کہ ملبے سے لاشیں نکالنے کے لیے محدود سازوسامان، بشمول ایک کھدائی کرنے والی مشین، استعمال کرتے ہوئے تلاش کا عمل جاری رکھا جائے گا۔

فلسطینی حکام کا کہنا ہے کہ اسرائیلی فورسز غزہ کے  نصف  سے زیادہ حصے پر قابض ہیں اور جنگ بندی کے باوجود اس علاقے کے دیگر حصوں میں حملے جاری رکھے ہوئے ہیں۔