کمبوڈیا نے تھائی لینڈ سے، ملائیشیا کے شہر کوالالمپور کے غیر جانبدار علاقے میں، دوطرفہ مذاکرات کی درخواست کی ہے۔

اے ایف پی کو بروز منگل موصول ہونے والے ایک خط  کے مطابق دو ہفتوں سے جاری مہلک سرحدی جھڑپوں کے بعد دونوں ملک جنگ بندی شرائط پر بات چیت کرنے والے ہیں۔

بنکاک شعبہ  دفاع کے سربراہ نے منگل کے روز جاری کردہ بیان میں کہا ہے کہ کمبوڈیا، تھائی لینڈ میں مذاکرات سے متعلق اپنے اندیشے  دُور کرنے کی کوشش کر رہا ہے اور دوسری طرف تھائی لینڈ وزارتِ خارجہ مذاکراتی مقام کے بارے میں تاحال بات چیت جاری رکھے ہوئے ہے۔

حکام نے کہا ہے کہ ایک طویل عرصے سے جاری سرحدی جھڑپیں اس مہینے دوبارہ بھڑک اٹھی ہیں اور گذشتہ فائربندی کی خلاف ورزی  40 سے زائد افراد کی ہلاکت کا اور دونوں طرف سے 9 لاکھ سے زائد افراد کے بے گھر ہونے کا سبب بنی ہے۔

تھائی لینڈ کے وزیرِ خارجہ سیہاسک پھوانگ کیٹکیو نے بروز سوموار  آسیان (ASEAN) کے رکن ممالک کے ہم منصبوں کے ساتھ ملائیشیا کے دارالحکومت میں ہونے والی ملاقات کے بعد کمبوڈیا کے ساتھ مذاکرات کا اعلان کیا تھا۔

سیہاسک نے صحافیوں کو بتایا  ہےکہ یہ مذاکرات بدھ کو تھائی لینڈ کے شہر  چنتھابوری میں موجودہ دوممالک کی  سرحدی کمیٹی کے درمیان  ہوں گے۔

لیکن پیر کو کمبوڈیا کے  وزیر دفاع  ٹیا سیہا نے اپنے تھائی ہم منصب نٹافون نرکپانِت کو  ارسال کردہ  مراسلے میں درخواست کی  ہے کہ ملاقات کوالالمپور میں  کی جائے۔

مراسلے میں ٹیا سیہا نے کہا ہے کہ سرحد پر جاری لڑائی کی وجہ سے سکیورٹی کو مدنظر رکھتے ہوئے یہ ملاقات ایک محفوظ اور غیر جانبدار مقام پر ہونی چاہیے۔ یہ مراسلہ منگل کو  اے ایف پی کو موصول ہوا ہے  اور وزارت نے اس کی تصدیق کی ہے۔

انہوں نے کہا کہ آسیان بلاک کے صدر ملک ملائیشیا نے  مذاکرات کی میزبانی کے لیے اپنے دارالحکومت میں جگہ دینے پر رضا مندی ظاہر کی ہے۔