ایران کی پاسدارانِ انقلاب فورس نےکہا ہے کہ ہم نے کویت میں واقع امریکی فضائی اڈّے کو نشانہ بنایا ہے۔

پاسدارانِ انقلاب فورس نے ایران کے جنوبی شہر بندر عباس کے ہوائی اڈے کے قریب امریکی فضائی حملے کے جواب میں کویت میں  واقع ایک امریکی فضائی اڈے کو نشانہ بنانے کا اعلان کیاہے۔

ایران کی نیم سرکاری تسنیم خبر ایجنسی کے مطابق پاسدارانِ انقلاب نے کہا  ہےکہ یہ جوابی حملہ جمعرات کو صبح 4 بج کر 50 منٹ پر امریکی حملے سے چند گھنٹے بعد کیا گیاہے۔

حملے  میں امریکہ نے بندر عباس کے ہوائی اڈے کے قریب ایک مقام کو فضائی ہتھیاروں سے نشانہ بنانے کا دعویٰ کیا تھا۔

بیان میں کہا گیا ہے کہ "یہ جواب دشمن کے لئے ایک  سخت انتباہ ہے کہ وہ جان لے کہ جارحیت کا جواب ضرور دیا جائے گا اور اگر حملے دہرائے گئے تو ہمارا ردِعمل زیادہ سخت ہوگا"۔

امریکی فوج کی جانب سے فوری طور پر کوئی بیان جاری نہیں کیا گیا۔

اس سے قبل ایک امریکی عہدیدار نے جاری کردہ بیان میں کہا  تھا کہ امریکی افواج نے آبنائے ہرمز کے قریب اور امریکہ کے لئے خطرہ سمجھے جانے والے چار ایرانی ڈرون مار گرائے اور بندر عباس میں موجود ایرانی زمینی کنٹرول اسٹیشن کو بھی نشانہ بنایا گیا جہاں  پانچواں ڈرون اڑان کی تیاری میں تھا ۔

نام ظاہر نہ کرنے کی شرط پر عہدیدار نے کہا ہے کہ "یہ اقدامات محدود اور مکمل طور پر دفاعی نوعیت کے تھے اور جنگ بندی کو برقرار رکھنے کے لئے کئے گئے ہیں"۔