مقامی میڈیا  کے مطابق جنوبی کوریا کی بڑی دفاعی کمپنی ہنوہا ایروسپیس نے پیر کو کہا کہ گزشتہ ہفتے ناروے کو طویل فاصلے کے کثیر راکٹ لانچر فراہم کرنے کا معاہدہ حاصل کرنے کے بعد وہ نارڈک خطے میں بطور طویل مدتی حفاظتی شراکت دار اپنا کردار وسیع کرنے کا ارادہ رکھتی ہے۔

یون ہاپ نیوز ایجنسی کی رپورٹ کے مطابق، کمپنی کے صدر اور چیف ایگزیکٹو آفیسر سون جے-ایل نے ایک بیان میں کہا ہے کہ ناروے کی جانب سے ہنوہا ایروسپیس کے 'چونمو' کثیر راکٹ لانچر سسٹم (MRLS) کا انتخاب اس اعتماد کی عکاسی کرتا ہے جو ہنوہا کے K9 خود کار ہاوٹزرز کی پہلے کی فروخت  کے ذریعے قائم ہوا تھا۔

سون نے مزید کہا، "ہم ناروے کے ساتھ قریبی تعاون کے ذریعے نارڈک خطے کی طویل مدتی سیکورٹی میں اپنا حصہ ڈالنے اور بطور اسٹریٹجک سکیورٹی پارٹنر اپنے کردار کو مزید فروغ دینے کے لیے پرعزم رہیں گے۔"

ناروے کی ڈیفنس میٹیریل ایجنسی (NDMA) کے ساتھ دستخط شدہ معاہدے کے تحت، ہنوہا ایروسپیس ناروے کی مسلح افواج کو 16 چونمو MRLS یونٹس، دقیق رہنمائی والے میزائلوں کا ایک پیکج اور مربوط لاجسٹکس سپورٹ فراہم کرے گی۔

یہ معاہدہ، جس کی مالیت تقریباً 2 ارب ڈالر بتائی گئی ہے، ہنوہا ایروسپیس اور ناروے کی فوج کے درمیان تقریباً ایک دہائی کے تعاون کے بعد سامنے آیا ہے۔

کمپنی مشترکہ ترقیاتی کام اور مقامی تجربات کے ذریعے ناروے کی صنعت کے ساتھ تعاون کو مضبوط بنانے کا بھی ارادہ رکھتی ہے۔