جنوب مشرقی ایشیائی اقوام کی تنظیم آسیان کے رکن ممالک کے وزرائے خارجہ نے منیلا میں اپنے سالانہ اجلاس کا آغاز کیا، جس میں بڑھتی ہوئی جیو پولیٹیکل کشیدگی، سمندری حدود کے تنازعات اور جاری تنازعات کے سائے میں مضبوط اتحاد اور مربوط کارروائی کا مطالبہ کیا گیا ہے۔

آسیان کے 59ویں وزرائے خارجہ کے اجلاس کی افتتاحی تقریب سے خطاب کرتے ہوئے فلپائن کی وزیر خارجہ ما۔ تھریسا پی لازارو  نے رکن ممالک پر زور دیا کہ وہ ایک ایسی دنیا میں جو تیزی سے غیر یقینی اور غیر متوقع صورتحال کا شکار ہو رہی ہے، شعوری طور پر مسائل حل کرنے کے نقطہ نظر کے ساتھ آگے بڑھیں۔

سال 2026 کے لیے فلپائن کی آسیان صدارت کے موضوع "باہمی مستقبل کی سمت کا  مشترکہ تعین " کا حوالہ دیتے ہوئے لازارو نے کہا کہ اس اتحاد کو بیرونی دباؤ پر محض ردعمل ظاہر کرنے کے بجائے اپنے مستقبل کو مل کر تشکیل دینا چاہیے۔

ہفتہ بھر جاری رہنے والے ان اجلاسوں کے ایجنڈے کا بنیادی حصہ علاقائی سیکیورٹی کے معاملات پر مشتمل ہوگا۔

 اس دائرہ کار میں، میانمار میں آسیان کی تعطل کا شکار امن کوششوں کو دوبارہ فعال کرنے اور چین کے ساتھ طویل عرصے سے زیرِ بحث جنوبی چین کے سمندری ضابطہ اخلاق کے معاہدے کے لیے مذاکرات کو تیز کرنے جیسے امور پر غور کیا جائے گا۔

منیلا میں ہونے والے یہ اجلاس نومبر میں منعقد ہونے والی آسیان سربراہی کانفرنس  سے قبل آسیان کے اہم ڈائیلاگ پارٹنرز بالخصوص امریکہ، چین، روس، جاپان، بھارت اور یورپی یونین کی شرکت کے ساتھ ہونے والی ملاقاتوں کے بعد اختتام پذیر ہوں گے۔