ایرانی میڈیا رپورٹس کے مطابق ایران کے جزیرہ قشم  پر دھماکوں کی آوازیں سنی گئی ہیں۔

پاسداران انقلاب ایران  (IRGC) کا کہنا ہے کہ جنوبی ایران میں قشم جزیرے پر امریکی حملے کے بعد کویت میں امریکی اڈوں کو نشانہ بناتے ہوئے جوابی حملے کیے گئے ہیں۔

بیان میں خبردار کیا گیا ہے کہ ایران کے خلاف کسی بھی مزید حملے کا "فیصلہ کن" جواب دیا جائے گا، اور ایران کے خلاف کارروائیوں میں ملوث قوتوں کو سنگین نتائج کا سامنا کرنا پڑے گا۔

دوسری طرف، امریکی سینٹرل کمانڈ (CENTCOM) نے قشم جزیرے پر حملوں کی تصدیق کر دی ہے۔

سینٹکام نے ایکس پر پوسٹ کیا کہ امریکی افواج نے متعدد ایرانی بیلسٹک میزائلوں اور ڈرونز کو کامیابی سے تباہ کیا، اور 2 جون کو مشرق وسطیٰ میں ایران کی جانب سے حملوں کی کوششوں کے جواب میں قشم جزیرے پر دفاعی حملے کیے۔"

بیان میں مزید کہا گیا کہ امریکی افواج نے سویلین بحری جہازوں کی طرف ایران کی جانب سے داغے گئے تین یکطرفہ حملہ آور ڈرونز کو مار گرایا۔

ان حملوں میں کسی بھی امریکی اہلکار کو نقصان نہیں پہنچا۔

اسی دوران، کویتی فوج کا کہنا ہے کہ کویت کے فضائی دفاعی نظام نے بدھ کی صبح سویرے

دشمن کے میزائل اور ڈرون حملوں کا جواب دیا ہے۔

کویتی فوج کے مطابق ملک بھر میں سنی جانے والی دھماکوں کی آوازیں فضائی دفاعی نظام کی جانب سے کی جانے والی روک تھام کی کارروائیوں کا نتیجہ تھیں۔

فی الحال اس بارے میں مزید تفصیلات دستیاب نہیں ہیں۔