گوئٹے مالا نے 'فیوگو پہاڑ' میں شدید آتش فشانی دھماکے کے بعد دوسرے درجے کا ہنگامی الرٹ جاری کر دیا ہے۔
گوئٹے مالا محکمہ قدرتی آفات ‘کونریڈ’ نے سوشل میڈیا پلیٹ فارم ایکس سےجاری کردہ بیان میں کہا ہے کہ "فیوگو آتش فشاں میں دھماکے کے باعث ملک بھر میں نارنجی درجے کا ہنگامی الارم نافذ کر دیا گیا ہے۔"
دارالحکومت گوئٹے مالا سٹی سے تقریباً 35 کلومیٹر دور واقع آتش فشاں کے قریب دو دیہات سے لوگوں کے انخلا کا عمل شروع کر دیا گیا ہے۔
واضح رہے کہ فیوگو آتش فشاں وسطی امریکہ کا فعال ترین آتش فشاں ہے۔پہاڑ میں بار بار ہونے والے دھماکوں کے باعث حالیہ برسوں میں اس علاقے سے متعدد مرتبہ بڑے پیمانے پر لوگوں کو محفوظ مقامات پر منتقل کیا جا چکا ہے۔
گوئٹے مالا بحرالکاہل کی معروف 'آتشیں پٹی' پر واقع ہے اور یہاں اکثر زلزلے آتے اور آتش فشاں پھٹتے رہتے ہیں۔
گزشتہ سال فیوگو آتش فشاں سے گیس اور راکھ کے اخراج کے بعداطراف کے علاقوں سے 500 سے زائد افراد کو محفوظ مقامات پر اور دہانے کے بالکل قریب واقع آبادیوں کے رہائشیوں کو عارضی پناہ گاہوں میں منتقل کر دیا گیا تھا۔
حکومت نے متاثرہ علاقے کے اسکولوں میں تدریسی سرگرمیاں معطل کر دیں اور ملک کے جنوبی حصے کو یونیسکو کے عالمی ثقافتی ورثے میں شامل تاریخی شہر انٹیگوا سے ملانے والی ایک اہم شاہراہ بھی بند کر دی ہے۔
