روس کی طرف سے حملوں کے نتیجے میں یوکرین کے شمال مشرقی علاقے 'خارکیف' میں چار افراد  ہلاک اور 10 زخمی ہو گئے ہیں۔

خارکیف کےعلاقائی  گورنر اولیگ سینیگوبوف نے منگل کو ٹیلی گرام سے جاری کردہ بیان میں کہا ہے کہ "دشمن نے چوگوئیو شہر کو نشانہ بنایا ہے۔ حملے میں ایک 22 سالہ عورت سمیت 4 افراد ہلاک ہو گئے ہیں۔

سینیگوبوف نے کہاہے کہ "حملوں کے نتیجے میں  آگ لگ گئی ۔کم از کم 18 گاڑیاں تباہ ہوگئیں، کثیر المنزلہ رہائشی عمارتوں کی کھڑکیاں اڑ گئیں اور عمارتوں کے چہرے کو نقصان پہنچا ہے" ۔

ایک اور بیان میں  خارکیف کے میئر اِگور تیرخوف نے اپنے شہر میں 10 افراد کے زخمی ہونے کی اطلاع دی ہے۔

واضح رہے کہ گزشتہ چند ماہ میں روسی حملے تیز ہو گئے ہیں۔ یوکرین نے روسی علاقے میں مزید اندر تک  ڈرون حملے کر کے  جوابی کارروائی کی  اور کہاہے کہ ہدف بنائے گئے مقامات  زیادہ تر فوجی اور توانائی کے مقام تھے۔

امن کی کوششیں

یہ حملے ، یوکرین کے صدر وولودیمیر زیلنسکی کی لندن میں برطانیہ، فرانس اور جرمنی کے رہنماؤں کے ساتھ بات چیت کے بعد کیف واپسی  کے دوران کئے گئے ہیں۔ ملاقاتوں کا مقصد  چار سالہ جنگ کے حل کے لیے آگے بڑھنے کا راستہ تلاش کرنا تھا۔

واشنگٹن کے،  ایران جنگ کے حل پر توجہ مرکوز  کرنے کے بعد سے امریکی زیرِ قیادت جاری  یوکرین۔ روس امن کوششیں سست پڑ گئی ہیں۔

زیلنسکی نے پیر کو جاری کردہ بیان میں کہا  ہےکہ امریکی نمائندوں اسٹیو وٹکوف اور جیرڈ کوشنر کے ساتھ ان کی بات چیت  'مثبت' رہی ہے۔  زیلنسکی  نے دونوں امریکی حکام کی، آنے والے ہفتوں میں، یوکرین جنگ کے حل پر کام کرنے کی آمادگی کو بھی سراہا ہے۔

اقوام متحدہ کے اپریل میں شائع کردہ ایک اندازے کے مطابق  2022 کے بعد سے یوکرائنی علاقوں میں کم از کم 15,850 شہری ہلاک ہو چکے ہیں۔

اقوام متحدہ کی گنتی کے مطابق روس کے زیرِ کنٹرول علاقوں میں 2,800 سے زیادہ شہری ہلاک  اور یوکرائن اور روس کے زیرِ قبضہ علاقوں میں 44,800 سے زائد افراد زخمی ہوئے ہیں۔