ماسکو اور کیف نے ایک دوسرے پر طویل فاصلے کے حملے تیز کر دیے  ہیں تو یوکرینی حکام نے بدھ کو کہا کہ رات کے دوران روسی میزائل اور ڈراون حملوں  میں کیف میں 14 افراد ہلاک اور 27 زخمی  ہو گئے ہیں۔

یوکرین کی ہنگامی سروس نے کہا کہ اس بمباری نے دارالحکومت کے گردونواح کے علاقے میں رہائشی عمارتوں اور چند گوداموں کو نقصان پہنچایا۔

کیف نے رات بھر کے حملے میں روس پر شہریوں اور شہری بنیادی ڈھانچے کو جان بوجھ کر نشانہ بنانے کا الزام لگایا۔

سرحد پار حملوں میں اضافہ

اے ایف پی کے تجزیے کے مطابق، تازہ ترین حملہ اس وقت ہوا ہے جب روس اور یوکرین دونوں طویل فاصلے کے حملے بڑھا رہے ہیں، اور روس نے پچھلے چند ہفتوں میں بیلسٹک میزائلوں کے استعمال میں نمایاں اضافہ کیا ہے۔

یوکرین نے بارہا اپنے مغربی حلیفوں سے کہا ہے کہ وہ مزید امریکی ساختہ پیٹریاٹ  فضائی دفاعی نظام فراہم کریں، اور کہا ہے کہ روس کی بڑھتی ہوئی میزائل مہم کا مقابلہ کرنے کے لیے اضافی انٹرسیپٹر درکار ہیں۔

صدر ولودیمیر زیلنسکی نے دلیل دی ہے کہ بیلسٹک میزائل انٹرسیپٹرز کی کمی مزید حملوں کی راہ ہموار کر رہی ہے،انہوں نے حال ہی میں امریکی صدر ڈونالڈ ٹرمپ کے ساتھ مقامی طور پر  پیٹریاٹ  کی تیاری پر بات کی تھی۔

دریں اثنا، روسی حکام کا کہنا تھا کہ فضائی دفاع نے رات کے دوران متعدد یوکرینی ڈرونز کو روکا، جن میں کم از کم 10 ماسکو کی جانب جا رہے تھے۔ تولا علاقے کے عہدیداروں نے کہا کہ 107 ڈرونز مار گرائے گئے، جن کے ملبے نے رہائشی عمارتوں کو نقصان پہنچایا اور وائلڈ بیریز کی ایک لاجسٹکس تنصیب  میں آگ لگا دی۔

یوکرین کا الزام ہے کہ وائلڈ بیریز روسی فوج کی حمایت کر رہا ہے اور ڈراون کے پارچہ جات  کا ذخیرہ کر رہا ہے، جس کے بارے میں کمپنی  نے  کوئی جواب نہیں دیا۔

یہ تازہ کشیدگی اقوام متحدہ کے انسانی حقوق کے نگرانوں کی بڑھتی ہوئی تشویش کے درمیان سامنے آئی ہے جو کہ شہری جانی نقصان میں اضافے پرفکر مند ہیں اور کہتے ہیں کہ یہ  2022 میں روس کی وسیع پیمانے پر  فوجی مہم کے ابتدائی ماہ کے بعد سے سب سے زیادہ ہیں۔