امریکی وزیر دفاع پیٹ ہیگستھ نے اتوار کے روز کہا کہ جاپان چینی جارحیت سے نمٹنے میں واشنگٹن کی مدد کرتے ہوئے خطے میں ایک 'قابل اعتماد' دفاعی نظام قائم کرنے کے لیے ناگزیر ہے، جس میں تائیوان اسٹریٹ بھی شامل ہے۔

ہیگستھ نے ٹوکیو میں جاپانی وزیر دفاع جین ناکاتانی سے ملاقات کے دوران کہا، 'ہم ایک جنگجو جذبہ رکھتے ہیں جو ہماری افواج کی تعریف کرتا ہے۔'

پینٹاگون نے جاپان کو 'انڈو پیسیفک میں امن و سلامتی کا سنگ بنیاد' قرار دیتے ہوئے کہا کہ صدر ڈونلڈ ٹرمپ کی انتظامیہ ماضی کی حکومتوں کی طرح اپنے اہم ایشیائی اتحادی کے ساتھ قریبی تعاون جاری رکھے گی۔

جاپان میں تقریباً 50,000 امریکی فوجی اہلکار، لڑاکا اسکواڈرنز، اور واشنگٹن کا واحد فارورڈ تعینات طیارہ بردار جہاز حملہ گروپ موجود ہے، جو 3,000 کلومیٹر (1,900 میل) طویل جزائر پر مشتمل ہے اور چینی فوجی طاقت کو محدود کرنے میں مدد دیتا ہے۔

ہیگستھ کی جاپان کی تعریف اس تنقید کے برعکس ہے جو انہوں نے فروری میں یورپی اتحادیوں پر کی تھی، انہوں نے کہا کہ انہیں یہ فرض نہیں کرنا چاہیے کہ وہاں امریکی موجودگی ہمیشہ کے لیے رہے گی۔

ہفتے کے روز، انہوں نے ایوو جیما میں ایک یادگاری تقریب میں شرکت کی، جو دوسری جنگ عظیم کے دوران امریکی اور جاپانی افواج کے درمیان گھمسان کی جنگ کا مقام تھا۔

جارح چین

ہیگستھ نے مزید کہاکہ امریکہ تائیوان راہداری میں 'مضبوط، تیار اور قابل اعتماد دفاع' کو یقینی بنائے گا اور چین کو 'جارحانہ اور دباؤ ڈالنے والا' قرار دیا۔

ہیگستھ نے کہا، 'امریکہ انڈو پیسیفک میں، بشمول تائیوان اسٹریٹ، مضبوط، تیار اور قابل اعتماد دفاع کو برقرار رکھنے کے لیے پرعزم ہے۔'

بیجنگ نے حالیہ برسوں میں تائیوان کے ارد گرد فوجی دباؤ بڑھا دیا ہے، جس میں تقریباً روزانہ فضائی دراندازی شامل ہیں، اور اس نے خود مختار جزیرے کو اپنے کنٹرول میں لانے کے لیے طاقت کے استعمال کو مسترد نہیں کیا۔