امریکی صدر ڈونلڈ ٹرمپ نے کہا ہے کہ آبنائے ہرمز کے پاس گر کر تباہ ہونے والے ہیلی کاپٹر کا پائلٹ بالکل ٹھیک ہے۔

ٹرمپ نے یہ بات پیر کی رات دیر گئے نیویارک کے جان ایف کینیڈی انٹرنیشنل ایئرپورٹ پر این بی اے (NBA) فائنل میچ دیکھنے کے بعد صحافیوں سے گفتگو کرتے ہوئے کہی۔

نیویارک ٹائمز نے رپورٹ کیا تھا کہ امریکی فوج کا ایک اپاچی (Apache) جنگی ہیلی کاپٹر نامعلوم وجوہات کی بنا پر آبنائے کے قریب گر کر تباہ ہو گیا ہے۔

یہ حادثہ  گزشتہ  روز ایران اور اسرائیل کے درمیان ہونے والی فائرنگ کے تبادلے کے بعد پیش آیا، جس کی وجہ سے  جنگ بندی کو برقرار رکھنے کے لیے ہونے والے مذاکرات خطرے میں پڑ گئے ہیں۔

رپورٹ کے مطابق ابھی تک یہ واضح نہیں ہو سکا کہ آیا اپاچی ہیلی کاپٹر ایرانی فائرنگ کا نشانہ بنا، اس میں کوئی تکنیکی خرابی آئی تھی یا اسے کسی اور مسئلے کا سامنا کرنا پڑا تھا۔

وائٹ ہاؤس، امریکی محکمہ خارجہ اور امریکی سینٹرل کمانڈ نے اس معاملے پر فوری طور پر تبصرہ کرنے کی درخواستوں کا کوئی جواب نہیں دیا۔