اسلامی تعاون تنظیم نے یمن کے حوثیوں کی جانب سے اسلام کے مقدس شہر مکہ اور مدینہ کے خطے پر کیے گئے "مکروہ" حملوں کی مذمت کی ہے۔

تنظیم نے اپنے جنرل سیکرٹریٹ کی طرف سے جاری کردہ اور ایکس (ٹویٹر) پلیٹ فارم پر شیئر کیے گئے ایک سرکاری بیان میں، اس حملے اور سعودی عرب کے خلاف جاری جارحیت کی مذمت کی۔

بیان میں کہا گیا کہ اسلامی تعاون تنظیم  کا جنرل سیکرٹریٹ؛ حوثی گروپ کی جانب سے مکہ شہر اور مدینہ کے خطے پر کیے گئے مکروہ حملوں اور مملکتِ سعودی عرب کے خلاف اس کی مسلسل جارحیت کی مذمت کرتا ہے۔"

تنظیم نے اس بات پر زور دیا کہ اس طرح کے حملے شہریوں میں خوف پیدا کرتے ہیں، مقدس مقامات اور مساجد کی حرمت کو پامال کرتے ہیں اور دنیا بھر کے مسلمانوں کے جذبات کو بھڑکاتے ہیں۔ اس کے ساتھ ہی تصدیق کی کہ مقدس مقامات، عبادت گاہوں اور سویلین انفراسٹرکچر کے خلاف اقدامات ایک "دہشت گردانہ عمل ہیں جو اسلامی اقدار اور بین الاقوامی اصولوں، قوانین اور ضوابط کے ساتھ مطابقت نہیں رکھتے۔"

یہ واضح کیا گیا کہ مقدس مقامات کی حرمت کی خلاف ورزی ایک ایسا "ناقابلِ قبول اور ناقابلِ برداشت حملہ ہے جس کے مرتکب افراد کو سختی سے روکنا اور ان مقامات کی طرف ہاتھ بڑھانے کی جرات کرنے والوں کا راستہ بند کرنا ضروری ہے۔"

سعودی عرب کے ساتھ اپنی مکمل یکجہتی کا اظہار کرتے ہوئے، اسلامی تعاون تنظیم  نے ریاض کی جانب سے جارحیت کو روکنے، اپنی قومی سلامتی اور خودمختاری کے تحفظ اور مقدس مقامات کی حرمت کو برقرار رکھنے کے مقصد سے اٹھائے جانے والے تمام اقدامات کے لیے اپنی حمایت کا اعادہ کیا۔

مذکورہ بیان سعودی قیادت میں قائم اتحادی افواج کے اس اعلان کے بعد سامنے آیا ہے جس میں بتایا گیا تھا کہ منگل کے روز مکہ کے قریب حوثیوں کی طرف سے داغے گئے ایک ڈرون (UAV) کو سعودی فضائی دفاعی نظام نے روک کر تباہ کر دیا ہے۔

اتحادی افواج کے ترجمان ترکی المالکی نے بتایا کہ ڈرون کو مقامی وقت کے مطابق شام 18:50 کے قریب، ممنوعہ فضائی حدود میں داخل ہونے سے پہلے ہی روک دیا گیا تھا اور اس کا ملبہ اسلام کے سب سے مقدس شہر کے جنوب میں گرا۔

المالکی نے 27 جولائی 2017 کو شہر کی طرف داغے گئے بیلسٹک میزائل کا حوالہ دیتے ہوئے، اس واقعے کو مکہ کو نشانہ بنانے کی حوثیوں کی دوسری کوشش قرار دیا۔