مختلف رپورٹس کے مطابق، امریکہ اور یوکرین منگل تک ایک اہم معدنیات کے معاہدے پر دستخط کرنے کے قریب ہیں۔

 یہ ممکنہ اقدام اس وقت سامنے آ رہا ہے  جب امریکی صدر ڈونلڈ ٹرمپ اور یوکرینی صدر ولودیمیر زیلنسکی کے درمیان جمعہ کو اوول آفس میں ایک تلخ  کلامی ہوئی تھی، جس کی وجہ سے اس دن معاہدے پر دستخط کرنے کے منصوبے ناکام ہو گئے۔

ٹرمپ نے بالآخر زیلنسکی کو وائٹ ہاؤس سے  چلتا کر دیا تھا، اور پھر وہ یورپی اتحادیوں سے ملاقات کے لیے امریکہ سے روانہ ہو گئے۔

اے بی سی نیوز کے مطابق دو گمنام ذرائع نے خبردار کیا کہ ابھی کچھ بھی حتمی نہیں ہے، لیکن کہا کہ ٹرمپ نے اشارہ دیا ہے کہ وہ منگل کی شام کانگریس کے مشترکہ اجلاس سے خطاب کرنے سے پہلے اس معاہدے کو حتمی شکل دینا چاہتے ہیں،

پیر کے روز ٹرمپ نے معاہدے کے مستقبل کے بارے میں امید ظاہر کی، یہ کہتے ہوئے کہ وہ نہیں سمجھتے کہ یہ معاہدہ گزشتہ ہفتے زیلنسکی کے ساتھ تلخ ملاقات کے بعد ختم ہو چکا ہے۔

انہوں نے کہا، "یہ ہمارے لیے ایک زبردست معاہدہ ہے، کیونکہ، آپ جانتے ہیں، بائیڈن نے، بہت ہی بے وقوفی  کی۔ صاف کہوں تو350 ارب ڈالر ایک ملک کو دیے تاکہ وہ لڑ سکے اور کچھ کرنے کی کوشش کرے۔ اور آپ جانتے ہیں کہ کیا ہوا؟ ہمیں کچھ نہیں ملا۔"

انہوں نے مزید کہا، "جو ہم کر رہے ہیں وہ یہ ہے کہ ہم یہ سب واپس لے رہے ہیں، اور اس سے بھی زیادہ۔ بہت اہم ہے اس کاروبار کے لیے جس کے بارے میں ہم یہاں بات کر رہے ہیں، چپس اور سیمی کنڈکٹرز اور دیگر چیزوں کے لیے، ہمیں نایاب معدنیات کی ضرورت ہے۔

کشیدہ تعلقات

گزشتہ ہفتے، کشیدگی اس وقت بڑھ گئی جب زیلنسکی نے روسی صدر ولادیمیر پوتن پر کسی بھی مذاکرات میں اعتماد کرنے کے بارے میں شکوک و شبہات کا اظہار کیا، جن کا مقصد جنگ کا خاتمہ تھا، یہ کہتے ہوئے کہ ماضی کے معاہدے جنہیں روسی رہنما نے بار بار توڑا، مکمل جنگ سے پہلے کے سالوں میں کیے گئے تھے۔

ٹرمپ نے پہلے ہی یوکرین کی نیٹو میں شمولیت کو مسترد کر دیا تھا، جو ایک ٹرانس اٹلانٹک دفاعی اتحاد ہے جس میں کسی بھی نئے رکن کو شامل کرنے کے لیے متفقہ حمایت کی ضرورت ہوتی ہے۔

تنازعے کے بعد، زیلنسکی نے اچانک وائٹ ہاؤس چھوڑ دیا، اہم معدنیات کے معاہدے پر دستخط کیے بغیر، اور ٹرمپ کے ساتھ ایک منصوبہ بند مشترکہ پریس کانفرنس منسوخ کر دی۔