حزب اللہ نے لبنانی حکومت سے مطالبہ کیا ہے کہ وہ  حزب اللہ  کو غیر مسلح کر   نے سے متعلق اسرائیلی دھمکیوں کو مسترد کردے۔

حزب اللہ کے پارلیمانی بلاک نے ایک بیان میں کہا کہ قومی ترجیح اس علاقے پر اسرائیلی قبضے کا خاتمہ ہے جہاں سے دشمن نے 27 نومبر کے جنگ بندی معاہدے کے باوجود انخلا نہیں کیا،

لبنانی حکام کو فیصلہ کن کارروائی کرنی چاہیے اور دشمن کی طرف سے عائد کردہ شرائط پر عمل درآمد سے بچنا چاہیے جو ہماری فوج اور عوام کو ذلیل کرنے اور ہماری خودمختاری کی خلاف ورزی کرنے کے لیے عائد کی گئی ہیں،

لبنانی عوام کو یہ حق حاصل ہے کہ اگر قبضہ جاری رہا تو وہ مزاحمت کریں اور یہ ایک جائز حق ہے جسے مزید توثیق کی ضرورت نہیں ہے ۔

یہ بیان  ایسے وقت سامنے آیا جب اسرائیل نے لبنان میں اپنے حملوں کو روکنے کی شرط اس بات پر رکھی ہے کہ لبنانی حکومت کی جانب سے حزب اللہ کو سال کے آخر تک غیر مسلح کرنے کے منصوبے پر عمل درآمد کیا جائے جو کہ صرف چند دن دور ہے۔

حزب اللہ نے اسرائیل پر دباؤ ڈالنے کا مطالبہ کیا کہ وہ جنگ بندی معاہدے کے تحت اپنی ذمہ داریوں کو بلا کسی تاخیر یا شرائط کے پورا کرے۔

 یاد رہے کہ اسرائیل اور لبنان نے نومبر 2024 میں جنگ بندی کا معاہدہ کیا تھا۔

جنگ بندی کی شرائط کے تحت توقع تھی کہ اسرائیلی افواج جنوری میں جنوبی لبنان سے انخلا کریں گی لیکن وہ صرف جزوی طور پر نکلی ہے جبکہ   اس کی فوج تاحال پانچ سرحدی چوکیوں پر اپنی  موجودگی برقرار رکھے ہوئے ہے۔