جاپان کے جنوب مغربی صوبے کوماموتو میں گزشتہ ہفتے آنے والے شدید زلزلے میں ہلاکتوں کی تعداد بڑھ کر 38 ہو گئی ہے اور ہزاروں افراد اب بھی امدادی پناہ گاہوں میں مقیم ہیں۔

سرکاری نشریاتی ادارے 'این ایچ کے' کی آج بروز  اتوار نشر کردہ خبر کے مطابق حکام نے 36 افراد کی ہلاکت کی تصدیق کی ہے۔ مزید دو افراد کی موت کے بارے میں تحقیقات جاری ہیں تاکہ معلوم کیا جا سکے کہ آیا ان کی ہلاکت گزشتہ منگل کو آنے والے 7.1 شدت کے زلزلے کے باعث ہوئی ہے یا نہیں۔

زلزلے سے 3,400 سے زائد مکانات کو نقصان پہنچا ہے اور تقریباً 9,200 افراد 210 امدادی مراکز میں پناہ لیے ہوئے ہیں۔

کوماموتو میں 69 ہزار سے زیادہ گھروں اور کاروباری مراکز کو ابھی پینے کے صاف پانی کی فراہمی بحال نہیں ہو سکی۔

زلزلے سے متاثرہ طبی مراکز میں بھی معمول کی خدمات کی بحالی کے لیے کام جاری ہے۔

دوسری جانب، کوماموتو کے بعض علاقوں میں درجہ حرارت 37 ڈگری سینٹی گریڈ سے تجاوز کر جانے کے باعث، لُو لگنے کے شبے میں تقریباً 30 افراد کو ہفتے کے روز اسپتال منتقل کر دیا گیا ہے۔

واضح رہے کہ جاپان دنیا کے ان ممالک میں شامل ہے جہاں زلزلے سب سے زیادہ آتے ہیں۔ یہ ملک بحرالکاہل کے "رِنگ آف فائر"  یعنی 'آتشیں حلقے'  پر واقع ہے اور دنیا بھر میں 6 یا اس سے زیادہ شدت کے  تقریباً 20 فیصد زلزلے جاپان میں ریکارڈ کیے جاتے ہیں۔