کویت نے، ترکیہ اور سعودی عرب کے ساتھ سہ فریقی دفاعی معاہدہ طے کرنے پر ،پاکستان کو مبارکباد دی ہے۔
کویت وزارتِ خارجہ نے پیر کے روز جاری کردہ بیان میں کہا ہے کہ رات گئے ہونے والی ایک ٹیلی فونک ملاقات میں کویت کے وزیرِ خارجہ جراح جابر الاحمد الصباح نے اپنے پاکستانی ہم منصب اسحاق ڈار کو حال ہی میں طے پانے والے ' مکہ مشترکہ دفاعی معاہدے' کی مبارکباد پیش کی ہے۔
جمہوریہ ترکیہ کے صدر رجب طیب اردوعان، سعودی ولی عہد محمد بن سلمان اور پاکستان کے وزیرِ اعظم شہباز شریف نے جمعہ کے روز مکّہ مکّرمہ میں مذکورہ معاہدے پر دستخط کیے تھے۔
اس معاہدے کے تحت تینوں ممالک میں سے کسی ایک کے خلاف مسلح حملے کو تینوں ممالک کے خلاف حملہ تصور کیا جائے گا۔ معاہدے کے مقاصد میں اجتماعی دفاعی صلاحیت و مزاحمتی قوت کو مضبوط بنانا اور دفاعی تعاون کو مزید وسعت دینا بھی شامل ہے۔
علاقائی سلامتی کے خدشات
یہ معاہدہ ،ریاض، انقرہ اور اسلام آباد کے درمیان دفاعی تعاون کو مضبوط بنانے، مشترکہ تزویراتی مفادات کے تحت مشترکہ سلامتی کے چیلنجوں سے نمٹنے اور باہمی ردِعمل کو مربوط کرنے کی غرض سے، کئی برسوں سے جاری مشاورت کے بعد سامنے آیا ہے۔
یہ پیش رفت ایران اور امریکہ کے درمیان تنازعے کے بعد آبنائے ہرمز میں بڑھتی ہوئی کشیدگی کے دوران سامنے آئی ہے۔باوجودیکہ سمندری آمدورفت کی آزادی برقرار رکھنے کے لیے سفارتی کوششیں جاری ہیں اس کشیدگی نے عالمی توانائی کی رسد و بحری سلامتی سے متعلقہ خدشات میں اضافہ کر دیا ہے ۔
دونوں وزرائے خارجہ نے مقبوضہ مشرقی القدس سمیت علاقائی صورتِ حال پر بھی تبادلۂ خیال کیا ہے۔
اسحاق ڈار اور جراح نے دوطرفہ تعلقات اور جراح کے حالیہ دورۂ پاکستان کے بعد ہونے والی پیش رفت سمیت باہمی دلچسپی کے دیگر امور پر بھی گفتگو کی۔ علاوہ ازیں اہم شعبوں میں تعاون اور سرمایہ کاری کو مضبوط بنانے کے طریقوں کا بھی جائزہ لیا گیا ہے۔
