امریکہ کے صدر ڈونلڈ ٹرمپ کی روحانی مشیر پاؤلا وائٹ۔کین کو کل بروز بدھ ٹرمپ اور حضرت عیسیٰ کے درمیان ایک متنازع موازنہ کرنے کے بعد سوشل میڈیا پر کَڑی تنقید کا سامنا ہے۔
پاؤلا وائٹ۔کین نے کہا ہے کہ "یسوع مسیح نے اپنی موت، تدفین اور دوبارہ زندہ ہونے کے واقعے کے ساتھ ہمیں بہت سے درس دیئے ہیں۔ انہوں نے ہمیں بتایا ہے کہ عظیم قیادت کیا ہوتی ہے اور یہ کہ عظیم تبدیلی عظیم قربانی مانگتی ہے۔اور جنابِ صدر، کسی نے آپ جیسی قیمت ادا نہیں کی۔ اس نے آپ کی زندگی کو تقریباً خطرے میں ڈال دیا تھا"۔
پاؤلا نے کہا ہے کہ"آپ سے غداری ہوئی، آپ کو گرفتار کیا گیا اور آپ پر غلط الزامات لگائے گئے۔ یہ سب کچھ اس مثال سے مشابہہ ہے جو ہمارے رب و نجات دہندہ نے ہمارے لئے قائم کی۔لیکن مسیح کے لئے یہ سب وہیں ختم نہیں ہوا اور آپ کے لیے بھی یہیں ختم نہیں ہوا"۔
روحانی مشیر نے مزید کہا ہے کہ "خدا کے پاس ہمیشہ ایک منصوبہ تھا۔ تیسرے دن مسیح جی اٹھے، انہوں نے برائی کو شکست دی، انہوں نے موت، دوزخ اور قبر پر فتح پائی۔ اور چونکہ وہ جی اٹھے، ہم سب جانتے ہیں کہ ہم بھی اٹھ سکتے ہیں۔ اور جناب، مسیح کے دوبارہ زندہ ہونے کی وجہ سے آپ بھی اٹھ کھڑے ہوئے ہیں" ۔
پاولا نے ٹرمپ کو مخاطب کرتے ہوئے کہا ہے کہ " مجھے یقین ہے کہ یہ رب کا حکم ہے کہ میں آپ کو یہ بتاؤں ۔ مسیح کی فتح کے طفیل آپ بھی ہر اس کام میں کامیاب ہوں گے جسے آپ ہاتھ لگائیں گے"۔
کین۔وائٹ کو سوشل میڈیا صارفین نے شدید تنقید کا نشانہ بنایا اور اس تقریر کو “توہینِ مذہب” اور “دیوانگی” قرار دیا ہے۔
