ترکیہ کے نائب صدر جودت یلماز نے 15 جولائی 2016 کی ناکام فوجی بغاوت کی دسویں برسی کے موقع پر جاری کردہ پیغام میں اس دن قوم کی طرف سے کی گئی مزاحمت کو خراجِ تحسین پیش کیا اور دہشت گردی سے پاک مستقبل کی تعمیر کے عزم کا اعادہ کیا ہے۔

یلماز نے 15 جولائی یومِ جمہوریت و قومی یکجہتی کے موقع پر ترک سوشل میڈیا پلیٹ فارم NSosyal پر جاری کردہ  پیغام میں 15 جولائی کے واقعات کوایک اہم تاریخی موڑ قرار دیا اور کہا ہے کہ اس واقعے نے گزشتہ دس برسوں کے دوران ریاست، قومی اتحاد اور ملک کی مضبوطی میں اہم کردار ادا کیا ہے۔

انہوں نے کہا ہے کہ"ہمارے صدر جناب رجب طیب اردوعان کی اپیل پر لاکھوں محبِ وطن شہری سڑکوں اور چوراہوں پر نکل آئے اور اپنی جانوں کی پرواہ کئے بغیر اپنے وطن، اپنے پرچم اور اپنی جمہوریت کا دفاع کرکے ملّی تاریخ کی عظیم ترین عوامی مزاحمتوں میں سے ایک کی مثال قائم کی۔ آج ترکیہ ایک زیادہ مضبوط، زیادہ مستحکم ریاست اور محکوم سوچ سے آزاد جمہوریت کے طور پر 'ترکیہ صدی' کے ہدف کی جانب پُراعتماد قدموں کے ساتھ  آگے بڑھ رہا ہے اور ہر قسم کی دہشت گردی سے پاک مستقبل کی تعمیر کے  عزم پر قائم ہے۔"

پیغام کے آخر میں یلماز نے کہاہے کہ"اس دن کی دسویں سالانہ یاد کے موقع پر میں اپنے عظیم شہداء کو دعائے رحمت اور جذباتِ عقیدت کے ساتھ یاد کرتا  اور اپنے بہادر غازیوں کو خراجِ تحسین پیش کرتا ہوں"۔