روس کے وزیر خارجہ سرگئی لاوروف اور امریکہ کے وزیر خارجہ مارکو روبیو نے تنازعہ یوکرین  کے حل کے امکانات اور پیر کو ترکیہ میں متوقع  روس۔یوکرین مذاکرات پر تبادلہ خیال کیا ہے۔

روس وزارت خارجہ  نے اتوار کو اپنی ویب سائٹ سے  جاری کردہ بیان میں کہا ہے کہ "مذاکرات میں یوکرین بحران سے متعلق صورتحال پر تبادلہ خیال کیا گیا ہے۔"

بیان میں مزید کہا گیا ہے کہ "ایس وی لاوروف اور ایم روبیو نے یوکرین بحران کے حل سے متعلق مختلف تجاویز پر خیالات کا تبادلہ کیا جن میں 2 جون کو استنبول میں روس۔یوکرین براہ راست مذاکرات  کےدوبارہ آغاز کا منصوبہ بھی شامل ہے۔"

امریکہ وزارت خارجہ نے جاری کردہ بیان میں  کہا  ہے کہ یہ ملاقات روس کی درخواست پر کی گئی تھی۔ مذاکرات میں  روبیو نے، پائیدار امن کے حصول کی خاطر  صدر ڈونلڈ ٹرمپ کی جانب سے کی گئی روس۔ یوکرین براہ راست مذاکرات کے دوام  کی اپیل کو دہرایا ہے۔

دریں اثنا، روسی خبر رساں ایجنسیوں نے کریملن کے مشیر ولادیمیر میڈنسکی کے حوالے سے کہا  ہے کہ روس کو یوکرین کی طرف سے امن معاہدے کا  مسودہ  موصول ہوا ہے۔

خبر ایجنسی تاس کے مطابق میڈنسکی نے، جو پیر کو یوکرین کے ساتھ امن مذاکرات کے لیے ماسکو کے وفد کی قیادت کر رہے ہیں، کہا ہے کہ "روسی وفد کو قبل ازیں  یوکرین سے پرامن حل کے لیے ایک مسودہ موصول ہوا تھا۔"

پلوں کا واقعہ

روس وزارت خارجہ نے مزید کہا  ہےکہ مذاکرات کے دوران  روبیو نے ان دو پلوں کے دھماکوں میں ہونے والی ہلاکتوں پر بھی تعزیت کی ہے جو یوکرین کی سرحد سے متصل روسی علاقوں میں الگ الگ واقعات میں تباہ ہوئے ہیں۔

روس کی طرف سے اس بات پر زور دیا گیا ہے کہ متعلقہ ادارے مکمل تحقیقات کریں گے، اور نتائج شائع کیے جائیں گے۔ قصورواروں کی نشاندہی کی جائے گی اور انہیں یقیناً مناسب سزا دی جائے گی۔

روسی حکام نے کہا ہے کہ ہفتے کے روز دو پلوں کے دھماکوں میں کم از کم سات افراد ہلاک اور 69 زخمی ہوئے ہیں۔

یوکرینی حملہ

دونوں حکام کے درمیان یہ ملاقات  ایسے وقت میں ہوئی ہےکہ  جب یوکرین نے روسی فضائی اڈوں پر ایک شدید حملہ کیا ہے۔

ایک یوکرینی حکومتی اہلکار نے رائٹرز نیوز ایجنسی کو بتایا  ہےکہ یوکرین نے روسی فضائی اڈوں پر کیے گئے ڈرون حملوں سے پہلے امریکہ کو مطلع نہیں کیاتھا۔

یوکرین کی داخلی انٹیلی جنس ایجنسی، ایس بی یو، نے کہا  ہےکہ وہ چار اڈوں پر حملوں کی ذمہ دار ہے، اور ایک سیکیورٹی اہلکار نے کہا ہے کہ کل 41 روسی جنگی طیارے نشانہ بنائے گئے ہیں۔

روس وزارت دفاع نے کہا  ہےکہ دو علاقوں میں اڈوں پر طیاروں میں آگ لگ گئی تھی جسے بجھا دیا گیا ہے۔