گیٹس فاؤنڈیشن نے کہا ہے کہ بل گیٹس نے، ایپسٹین فائلوں میں اپنا نام شامل ہونے کی وجہ سے، بروز جمعرات  بھارت میں منعقدہ ایک بڑے اے آئی اجلاس میں اپنی متوقع  تقریر منسوخ کر دی ہے۔

گیٹس فاؤنڈیشن نے جاری کردہ بیان میں کہا ہے کہ "بِل گیٹس نے محتاط  غور و خوض کے بعد اور اے آئی اجلاس کی توجہ بنیادی  ترجیحات پر مرکوز رکھنے کے لئے خطاب نہ کرنے کا فیصلہ کیا ہے۔ گیٹس فاؤنڈیشن بھارت میں صحت اور ترقی کے شعبوں میں ہمارے مشترکہ اہداف کو آگے بڑھانے کے کام کے لیے مکمل طور پر پرعزم ہے"۔

فاؤنڈیشن نے کہا ہے کہ بِل گیٹس کی جگہ فاونڈیشن کی افریقہ اور بھارت دفاتر کے صدر اجلاس سے خطاب کریں گے۔

بھارت کے وزیر اعظم نریندر مودی اور ٹیکنالوجی کے سی ای او جمعرات کو نئی دہلی میں AI Impact Summit میں مصنوعی ذہانت کے مواقع اور خطرات کے بارے میں بات کی۔

واضح رہے کہ گیٹس نے رواں مہینے جاری کردہ بیان میں کہا  تھا کہ وہ جیفری ایپسٹین کے ساتھ گزارے گئے "ہر لمحے" پر افسوس محسوس کرتے ہیں ۔

امریکی محکمہ انصاف کی جانب سے جاری  کردہ تازہ   دستاویزات میں ایپسٹین اور کئی نمایاں شخصیات کے درمیان ای میل شامل تھیں ۔ یہ ای میل خط و کتابت گرم جوش دوستیوں، غیر قانونی مالی لین دین اور نجی تصاویر پر مبنی ہے۔

دستاویزات میں موجود ایک مسودہ ای میل میں ایپسٹین نے الزام لگایا  ہےکہ گیٹس غیر ازدواجی تعلقات میں ملوث تھے۔