اسرائیل نے المواسی کے مغرب میں بے گھر فلسطینیوں کے کیمپ پر فضائی حملہ کر کے ایک فلسطینی عورت  اور ایک بچی کو قتل اور  کم از کم 22 فلسطینیوں کو  زخمی کر دیا ہے۔

ایک طبی ذریعے کی اندولو ایجنسی کو فراہم کردہ معلومات کے مطابق اسرائیلی حملے میں غیث کیمپ کو نشانہ بنایا گیا، جہاں بے گھر فلسطینی پناہ لیے ہوئے تھے۔ حملے میں ایک 31 سالہ عورت  اور 6 سالہ  بچی ہلاک ہو گئی ہے۔

ذرائع کے مطابق زخمی ہونے والے کم از کم 20 افراد میں سے اکثریت  عورتوں  اور بچوں پر مشتمل ہے۔

مقامی ذرائع اور عینی شاہدین کے مطابق  اسرائیلی بمباری نے گنجان آباد کیمپ میں قائم متعدد خیموں کو نشانہ بنایا ہے۔

دوسری جانب غزہ کے وسطی علاقے میں مقامی ذرائع کے مطابق، اسرائیل کے ایک اور فضائی حملے میں مغازی مہاجر کیمپ میں واقع ایک گھر کو نشانہ بنایا گیا، جس میں دو فلسطینی زخمی ہوگئے ہیں۔

غزّہ وزارتِ صحت کے جاری کردہ اعداد و شمار کے مطابق، جنگ بندی معاہدے کی مسلسل خلاف ورزیوں کے نتیجے میں جنگ بندی نافذ ہونے کے بعد سے اب تک 904 فلسطینی ہلاک  اور 2 ہزار 713 زخمی ہو چکے ہیں۔

یہ معاہدہ اس دو سالہ نسل کُشی جنگ کو روکنے کے لیے کیا گیا تھاجو اکتوبر 2023 سے اب تک 72 ہزار سے زیادہ فلسطینیوں کو نگل چُکی ۔ اسرائیل کی طرف سے قتل کئے گئے ان افراد کی اکثریت عورتوں اور بچوں پر مشتمل ہے۔ اسرائیل  172 ہزار سے زائد افراد کو  زخمی کر چُکا اور شہری بنیادی ڈھانچے کے تقریباً 90 فیصد کو تباہ کر چُکا ہے۔