امریکی خزانہ کے سیکریٹری اسکاٹ بیسنٹ نے خبردار کیا ہے کہ پابندیوں کا شکار ایرانی فضائی کمپنیوں کے ساتھ کام کرنے والے اداروں کو امریکی پابندیوں کا سامنا کرنا پڑ سکتا ہے۔ 

ایکس پر ایک پوسٹ میں  بیسنٹ نے اس انتباہ کو جاری جنگ کے دوران ایران پر اقتصادی دباؤ ڈالنے کی مہم کا حصہ قرار دیا۔ 

انہوں نے کہا کہ پابندیوں کا شکار ایرانی ایئرلائنز کے ساتھ کاروبار کرنا امریکی پابندیوں کے خطرے سے دوچار کرتا ہے۔

بیسنٹ نے غیر ملکی حکومتوں سے مطالبہ کیا کہ وہ یہ یقینی بنانے کے لیے تمام ضروری اقدامات کریں کہ ان کے دائرہ اختیار میں موجود کمپنیاں ان طیاروں کو خدمات فراہم نہ کریں۔ 

اس میں جیٹ فیول، کیٹرنگ، لینڈنگ فیس، یا   مرمت  کی فراہمی شامل ہے۔ 

بیسنٹ نے ایک بیان میں کہا کہ ہماری وزارت ایران پر زیادہ سے زیادہ دباؤ ڈالے گی اور ایسے کسی بھی تیسرے فریق کے خلاف کارروائی سے نہیں ہچکچائے گی جو ایرانی اداروں کو  سہولت فراہم کرے یا کاروبار کرے۔

یہ انتباہ ایسے وقت میں آیا ہے جب ایران نے جنگ کے آغاز کے بعد کچھ تجارتی پروازیں دوبارہ شروع کر دی ہیں۔ 

ایران کے سرکاری ٹیلی وژن نے اعلان کیا کہ ہفتے کے روز تہران سے کئی پروازیں روانہ ہوئیں۔ 

ایرانی سول ایوی ایشن آرگنائزیشن نے پہلے فضائی حدود کے کچھ حصوں کو دوبارہ کھولنے کا اعلان کیا تھا، خاص طور پر یہ بتایا تھا کہ ملک کے مشرقی حصے میں بین الاقوامی ٹرانزٹ راستے اب کھلے ہیں۔ 

امریکی امور خزانہ نے حال ہی میں "اکنامک فیوری" کے نام سے ایک پروگرام شروع کیا، جو ایران کے خلاف تیل کی تجارت سے منسلک عالمی اثاثوں کو نشانہ بنا کر ادارے کی مالی طاقت استعمال کرتا ہے۔ 

اس اقدام کے تحت امریکہ نے چینی بینکوں کو خطوط بھیجے جن میں دھمکی دی گئی کہ اگر وہ ایرانی تیل کے لین دین کو آسان بناتے رہے تو ان پر ثانوی پابندیاں عائد کی جائیں گی۔ 

بیسنٹ نے دوبارہ یقین دلایا کہ امریکہ ایرانی اثر و رسوخ کا مقابلہ کرنے کے لیے اپنی زیادہ  سے زیادہ دباؤ کی پالیسی برقرار رکھے گا۔