یمن میں حوثیوں کے شبوہ صوبے کے العلَم فوجی تربیتی کیمپ پر بیلسٹک میزائل حملے میں 50 سے زائد افراد کے ہلاک اور زخمی ہونے کی اطلاعات ہیں۔
یمنی میڈیا کا مقامی ذرائع کے حوالے سے کہنا ہے کہ حوثیوں نے شبوہ شہر میں واقع العلَم فوجی تربیتی کیمپ کو متعدد بیلسٹک میزائلوں سے نشانہ بنایا۔
رپورٹ میں کہا گیا ہے کہ اس حملے میں 50 سے زائد افراد ہلاک اور زخمی ہوئے ہیں۔
اس کیمپ میں وہ نئے اہلکار موجود تھے جو سکیورٹی فورسز میں شمولیت کے لیے تربیت حاصل کر رہے تھے، اس حملے کے بعد شبوہ جنرل ہسپتال کا ایمرجنسی وارڈ زخمیوں سے بھر گیا۔
شہریوں سے زخمیوں کے علاج میں مدد کے لیے فوری طور پر خون عطیہ کرنے کی اپیل کی گئی ۔
حملے میں ہلاک اور زخمی ہونے والوں کی حتمی تعداد کے بارے میں مقامی انتظامیہ یا شعبہ صحت کے حکام کی طرف سے تا حال کوئی سرکاری بیان جاری نہیں ہوا، جبکہ زخمیوں کو ہسپتالوں میں منتقل کرنے کا عمل جاری ہے۔
یمن میں حوثیوں کی طرف سے ستمبر 2014 میں دارالحکومت صنعا اور بعض صوبوں پر کنٹرول حاصل کرنے کے بعد خانہ جنگی چھڑ گئی تھی۔ مارچ 2015 سے سعودی عرب کی قیادت میں عرب اتحاد بین الاقوامی طور پر تسلیم شدہ یمنی حکومت کی حمایت کر رہا ہے۔
