تھائی لینڈ اور کمبوڈیا کے درمیان تازہ  سرحدی جھڑپیں بدھ کو اپنے گیارہویں دن میں داخل ہو گئیں، اور 7 دسمبر کو تصادم دوبارہ شروع ہونے کے بعد سے دونوں طرفین کے  کم از کم 52 افراد ہلاک ہو چکے ہیں۔

کمبوڈیا کی وزارت دفاع نے بدھ کو کہا کہ تھائی فوج نے سرحدی علاقے میں توپ خانے کے حملے اور ڈرون حملے کیے۔

وزارت نے مزید کہا کہ کمبوڈیائی  قوتوں نے تھائی مورچوں  پر BM-21 راکٹس فائر کر کے جوابی کاروائی کی۔

یہ پیش رفت تھائی فوجیوں  کی طرف سے  چونگ انہ ما کے علاقے پر قبضہ کر نے کے بعد سامنے آئی ہے۔

فائر بندی کے مطالبات

تھائی لینڈ نے منگل کو کہا کہ مہلک جھڑپوں کہ جن  کے نتیجے میں سرحد کے دونوں طرف 700,000 سے زائد افراد بے گھر ہو چکے ہیں کو روکنے کے لیے سب سے پہلے کمبوڈیا کو  فائر بندی  کا اعلان کرنا چاہیے۔

تھائی وزارت خارجہ کی ترجمان ماراٹی نالِتا اندامو نے کہا کہ کسی بھی فائر بندی  کو مخصوص شرائط پوری کرنی ہوں گی اور یہ  قابلِ اعتبار ہونا چاہیے، اور  انہوں نے اس تنازعے کے خاتمے کے لیے کمبوڈیا سے سرحدی علاقوں میں بارودی سرنگیں ہٹانے کی کوششوں میں مخلصانہ تعاون کی اپیل  کی۔

تھائی حکام کے مطابق اب تک 19 تھائی فوجی اور 16 تھائی شہری ہلاک ہو چکے ہیں۔ کمبوڈیا کی وزارت داخلہ کے مطابق 17 کمبوڈیائی شہری ہلاک اور 77 دیگر زخمی ہوئے ہیں۔

امن معاہدہ کمزور پڑ گیا

امریکی صدر ڈونلڈ ٹرمپ نے جمعہ کو کہا تھا کہ تھائی اور کمبوڈیا کے رہنماؤں نے دوبارہ شروع ہونے والی لڑائی کو روک دینے پر اتفاق کیا ہے، تا ہم  جھڑپیں اس کے باوجود جاری ہیں ۔

دونوں ممالک نے اکتوبر میں کوالالمپور میں صدر  ٹرمپ اور ملائیشیا کے وزیر اعظم انور ابراہیم کی  موجود گی  میں ایک امن معاہدے پر دستخط کیے تھے، لیکن بعد ازاں سرحدی صوبے میں ایک  بارودی سرنگ کے  دھماکے میں تھائی فوجیوں کے  شدید زخمی ہونے پر یہ معاہدہ معطل کر دیا گیا۔

تھائی حکام نے یہ بھی کہا کہ گزشتہ پانچ ماہ کے دوران پیش آنے والے واقعات کے بعد تقریباً 18 کمبوڈیائی فوجی تھائی حراست میں ہیں۔

تھائی لینڈ اور کمبوڈیا کے درمیان سرحدی تنازعہ طویل عرصے سے جاری ہے اور یہ بار بار پرتشدد جھڑپوں کی صورت اختیار کر چکا ہے، جن میں جولائی کی جھڑپیں بھی شامل ہیں جن میں کم از کم 48 افراد ہلاک ہوئے تھے۔