شمالی کوریا  نے 5000 ٹن وزنی نئے جنگی بحری جہاز کانگ کون سے جوہری صلاحیت رکھنے والے کروز میزائل اور دیگر ہتھیاروں کے تجربات کئے ہیں۔

سرکاری ذرائع ابلاغ کے مطابق صدر کم جونگ اُن نے تجربات کی نگرانی کی۔ یہ پیش رفت ایسے وقت میں سامنے آئی ہے جب پیانگ یانگ جوہری ہتھیاروں سے لیس بحریہ کی تعمیر کی کوششیں جاری رکھے ہوئے ہے۔

شمالی کوریا  کی سرکاری خبر ایجنسی 'کے سی این اے' کے مطابق، جمعہ کو کئے گئے ان تجربات میں اسٹریٹجک کروز میزائل، ڈسٹرائر کی مرکزی توپ، خودکار توپوں کی آزمائشی فائرنگ، الیکٹرانک وارفیئر نظاموں کے تجربات، اور ہدف کی نشاندہی و معلومات کی پراسیسنگ کی صلاحیتوں کا جائزہ شامل تھا۔

سرکاری خبر رساں ایجنسی کے مطابق، کم جونگ اُن نے ساحل سے ان تجربات کا مشاہدہ کیا اور متعلقہ حکام کو ہدایت دی کہ ڈسٹرائر کے تمام آزمائشی مراحل مکمل کیے جائیں اور آئندہ دو ماہ کے اندر اسے باضابطہ طور پر بحریہ میں شامل کر دیا جائے۔

بحریہ کی توسیع

یہ تجربات ایسے وقت میں کیے گئے جب شمالی کوریا نے جون کے آخر میں اپنے پہلے 5,000 ٹن وزنی ڈسٹرائر چوئے ہیون کو باضابطہ طور پر بحریہ میں شامل کیا تھا۔

فروری میں ورکرز پارٹی کی کانگریس سے خطاب کرتے ہوئے کم جونگ اُن نے آئندہ پانچ برسوں کے فوجی اہداف کا خاکہ پیش کیا تھا، جس میں آبدوز سے داغے جانے والے بین البراعظمی بیلسٹک میزائل تیار کرنے کا مطالبہ بھی شامل تھا۔

بیرونی تعاون

شمالی کوریا نے چوئے ہیون کو پہلی مرتبہ اپریل 2025 میں عوام کے سامنے پیش کیا تھا۔ کم جونگ اُن نے اسے فوج کی عملی رسائی اور پیشگی حملے کی صلاحیت میں توسیع کی جانب ایک اہم پیش رفت قرار دیا تھا۔