یوکرینی ڈرونز نے روس کے زیر قبضہ کریمیا کے شہر سیواستوپول میں ایک تاریخی میوزیم کو نشانہ بنایا ہے۔

مقامی حکام نے بتایا کہ فضائی حملوں کے پیش نظر رات کے وقت چلنے والی ٹرینوں کی تعداد کم کر دی گئی ہے۔

یہ میوزیم 1853 سے 1856 کے دوران روسی سلطنت اور سلطنت عثمانیہ سمیت دیگر اتحادیوں کے درمیان ہونے والی کریمیا کی جنگ کی یاد میں بنایا گیا ہے جس میں  روس کو شکست ہوئی تھی۔

سیواستوپول کے روس کی طرف سے مقرر کردہ گورنر میخائل رازوزیوف نے ٹیلی گرام پر بتایا کہ میوزیم کی چھت پر آگ لگی ہوئی ہے۔

 انہوں نے نقصان یا کسی کے زخمی ہونے کے بارے میں مزید تفصیلات فراہم نہیں کیں۔ رازوزیوف نے  آج  صبح اپنی پوسٹ میں کہا کہ دشمن کو اس گستاخی کی قیمت چکانی پڑے گی!۔

کریمیا میں ہی ایک اور جگہ پر حکام نے رات کے اوقات کے لیے ٹرینوں کے نظام الاوقات کو کم کر دیا ہے۔

 جزیرہ نما کے روسی گورنر سرگئی اکسیونوف نے ٹیلی گرام پر بتایا کہ یہ فیصلہ اس ہفتے ایک ڈرون حملے کے بعد کیا گیا جس میں ایک ٹرین ڈرائیور زخمی اور اس کا اسسٹنٹ ہلاک ہو گیا تھا۔

کریمیا، جسے روس نے 2014 میں یوکرین سے الگ کر کے اپنے ساتھ ملایا تھا، حالیہ یوکرینی ڈرون حملوں کے بعد ایندھن کی قلت کا سامنا کر رہا ہے اور یہ ایسے وقت میں ہو رہا ہے جب چھٹیوں کا سیزن شروع ہونے والا ہے۔