وینزویلا کے دارالحکومت کاراکاس میں صدارتی محل کے قریب فائرنگ اور دھماکوں کی اطلاع ملی ہے ۔آن لائن شیئر کی گئی ویڈیوز میں بھاری ہتھیاروں کے ساتھ مسلح افراد اور فوجی قافلے میرافلورز پیلس کے گرد تعینات نظر آ رہے ہیں۔
ویڈیو میں دکھایا گیا ہے کہ سیکیورٹی فورسز محل کے قریب سڑکوں پر گشت کر رہی ہیں جبکہ رہائشی چھپنے کی کوشش کر رہے تھے۔
مقامی ذرائع کے مطابق، فائرنگ مقامی وقت کے مطابق تقریبا رات 8 بجے ہوئی یہ بھِی اطلاع ملی ہے کہ بعض نامعلوم ڈرونز محل کے گرد گردش کر رہے ہیں، جس سے تشویش میں اضافہ ہورہا ہے کیونکہ حکام نے ابھی تک عوام کو صورتحال سے آگاہ نہیں کیا تھا۔
فوری طور پر زخمی یا ہلاکت کی اطلاع نہیں ملی جبکہ نقصان یا گرفتاریوں کے بارے میں کوئی سرکاری بیان جاری نہیں کیا گیا۔
یہ واقعہ اس وقت سامنے آیا جب نائب صدر ڈیلسی روڈریگز نے صدر نکولس مادورو اور ان کی اہلیہ سیلیا فلوریس کے امریکی فوجی آپریشن کے دوران حراست میں لینے کے بعد قائم مقام صدر کے طور پر حلف اٹھایا تھا۔
حکام نے اس بات کی تصدیق نہیں کی کہ محل کے قریب ہونے والے واقعات ملک میں جاری وسیع سیاسی بحران سے براہ راست منسلک تھے یا نہیں۔
