فلپائن کے صدر فرڈینینڈ مارکوس جونیئر نے  ملک میں ہنگامی حالت کا اعلان کردیا ہے ۔

 واضح رہے کہ  ملک کے وسطی صوبوں میں سمندری طوفان کلمیگی  کے سبب کم از کم 241 افراد  ہلاک اور لاپتہ ہوگئے ہیں۔

 وسطی صوبے سیبو  میں سیلاب   کے باعث  114 افراد ہلاک  اور 127 لاپتہ  ہو گئے ہیں  جبکہ اب یہ طوفان جنوبی بحیرہ چین میں  زور پکڑ رہا ہے۔

 اس طوفان نے تقریبا 20 لاکھ افراد کو متاثر کیا ، 560،000 سے زیادہ دیہاتیوں کو بے گھر کردیا جنہیں عارضی  پناہ گاہوں میں منتقل کر دیا  گیا  ہے ۔

 صدر مارکوس کا  یہ ہنگامی اعلان  انسداد آفات کے عہدیداروں کے ساتھ ایک  اجلاس  کے دوران کیا گیا تھا  جس سے حکومت کو ہنگامی فنڈز تیزی سے تقسیم کرنے اور غذائی  ذخیرہ اندوزی اور زیادہ قیمتوں کو روکنے کی اجازت ملے گی۔

اب  اس طوفان کا رخ ویتنام کی جانب ہو چکا ہے۔

ویتنام کے صوبے گیا لائی  سے تقریبا 3لاکھ 50 ہزارافراد کو نکالنے کی توقع ہے کیونکہ حکام نے شدید بارشوں اور  جھکڑوں  کے بارے میں خبردار کیا ہے جس سے نشیبی علاقوں میں سیلاب آسکتا ہے ۔

حکام  نے متنبہ کیا ہے کہ ملک کے مالیاتی مرکز  ہو چی منہ سٹی کو سیلاب کے شدید خطرے کا سامنا ہے ۔

دریائے سائگون پر اونچی لہروں کی توقع ہے  جبکہ شہر کے کچھ حصوں میں 100 ملی میٹر تک بارش ہوسکتی ہے  جس سے نشیبی علاقے  ڈوب سکتے ہیں

اس سال فلپائن سے ٹکرانے والے 20 ویں طوفان کلمیگی سے ہونے والی تباہی شمالی سیبو میں 6.9 شدت کے زلزلے کے ایک ماہ بعد آئی ہے ، جس میں درجنوں افراد ہلاک اور ہزاروں بے گھر ہوگئے ہیں۔

ویتنام کی  شہری ہوابازی کے  حکام کا کہنا ہے کہ ڈا نانگ کے بین الاقوامی ہوائی اڈے سمیت آٹھ ہوائی اڈوں پر آپریشن متاثر ہونے کا امکان ہے۔

  فضائی کمپنیوں  اور مقامی حکام پر زور دیا گیا ہے کہ وہ مسافروں کی حفاظت کو یقینی بنانے کے لئے طوفان کی پیشرفت پر گہری نظر رکھیں۔