اسرائیلی چینل 13 نے ایک نامعلوم سینئر اسرائیلی عہدیدار کے حوالے سے رپورٹ کیا  ہے کہ امریکہ نے اسرائیل کو مطلع کیا ہے کہ تل ابیب کو لبنان میں "بے روک ٹوک کارروائی" کی اجازت ختم ہو گئی ہے ۔

ذرائع کے مطابق، حالیہ ہفتوں میں امریکہ نے اسرائیل کو پیغام بھیجا  ہے کہ "لبنان میں غیر محدود کارروائی کی سابقہ اجازت کی مدت ختم ہو چکی ہے۔"

چینل نے پیر کو کہا کہ امریکی صدر ڈونلڈ ٹرمپ "اسرائیل پر پابندیاں لگا رہے ہیں، نہ صرف لبنان میں بلکہ دیگر میدانوں میں بھی" حالانکہ نیتن یاہو کا دعویٰ ہے کہ جنوبی لبنان میں اسرائیلی افواج " کو مکمل طور پر عملی آزادی  حاصل ہے۔"

رپورٹ کے مطابق، اسرائیلی سیاسی قیادت نے فوج کو باقاعدہ ہدایات جاری کی ہیں جن میں لبنان میں مجاز اور ممنوعہ نقل و حرکت کی حدود بتائی گئی ہیں۔

اس نے مزید کہا کہ "یہ ہدایات دارالحکومت بیروت اور جنوبی لبنان کے ضلع صور جیسے علاقوں میں کارروائیوں کی ممانعت کرتی ہیں۔"

'کمزوری کی علامت'

پیر کو ہی، اسرائیلی روزنامہ معاریو نے واشنگٹن اور تل ابیب کے درمیان لبنان کے معاملے پر آراء میں اختلافات کی رپورٹ دی۔

اخبار کا کہنا  ہےکہ واشنگٹن جنوبی لبنان کو ایک وسیع تر علاقائی سیاق و سباق میں دیکھتا ہے جس میں آبنائے  ہرمز، توانائی کی قیمتیں، ایرانی جوہری مسئلہ، اور ٹرمپ انتظامیہ کی سفارتی پیشرفت حاصل کرنے کی ضرورت شامل ہیں۔

خبر میں ہے کہ اس کے برعکس، اسرائیل کا ماننا ہے کہ جنوبی لبنان سے قبل از وقت واپسی کو "کمزوری کی علامت" کے طور پر دیکھا جا سکتا ہے اور یہ حزب اللہ کے لیے ایک انعام ہو گی۔

اسرائیل نے لبنان پر اپنی جارحیت کے دوران 2 مارچ سے اب تک 4,000 سے زائد افراد کو ہلاک، 12,000 کو زخمی اور ایک ملین سے زائد افراد کو بے گھر کر دیا ہے۔

اسرائیل جنوبی لبنان کے ایسے علاقوں پر قابض ہے جو بعض جگہوں پر دہائیوں سے اور کچھ 2023-2024 کی جنگ کے دوران قبضے میں لیے گئے تھے۔