رومانیہ نے یوکرین کے ساتھ اپنی سرحد کے قریب تین ڈرونز کا پتہ چلنے کے بعد دو ایف-16 F-جنگی طیارے فضا میں روانہ کیے اور ایک فوجی ہیلی کاپٹر تعینات کیا ہے۔

ڈرونز کی شناخت یوکرینی شہر ویلکوو  کے قریب کی گئی جو رومانیہ کی سرحد اور ڈینیوب ڈیلٹا کے نزدیک واقع ہے۔

 رومانیہ کے حکام نے ضلع تُلچا  کے شمالی حصے کے رہائشیوں کے لیے آر او-ایلرٹ وارننگ جاری کی کہ فضا سے اشیاء نیچے گر سکتی ہیں۔

صورتحال کی نگرانی کے لیے رومانیہ کی فضائیہ کے دو ایف-16 جنگی طیاروں نے اڑان بھری، جبکہ سرحدی علاقے میں نگرانی کے لیے ایک فوجی ہیلی کاپٹر بھی تعینات کیا گیا۔

 وزارت کا کہنا ہے کہ ریڈار کے ڈیٹا سے معلوم ہوا کہ ڈرونز یوکرینی فضائی حدود میں ہی رہے اور انہوں نے رومانیہ کی سرحد عبور نہیں کی۔

 بعد ازاں، حکام کی جانب سے رومانیہ کی سرزمین کو کسی فوری خطرے کی عدم موجودگی کا تعین کرنے کے بعد عوامی وارننگ واپس لے لی گئی۔

نیٹو  اور یورپی یونین کا رکن ملک رومانیہ دریائے ڈینیوب کے ساتھ یوکرین کی  سرحد شیئر کرتا ہے اور اس نے اپنی سرزمین کے قریب ڈرون سرگرمیوں کے جواب میں بارہا فوجی طیارے فضا میں روانہ کیے ہیں۔

 اس سے قبل بھی ڈینیوب کے ساتھ یوکرینی بندرگاہوں اور انفراسٹرکچر پر روسی حملوں کے بعد رومانیہ کے سرحدی علاقوں سے ڈرونز کے ٹکڑے ملے ہیں۔

 بخارسٹ نے ان خدشات کے پیشِ نظر خطے میں فضائی نگرانی اور دفاعی اقدامات کو مضبوط کر دیا ہے کہ یہ تنازع نیٹو کی سرحدوں تک نہ پھیل جائے۔