جاپان میں جانگمی طوفان صوبہ واکایاما کے ساحلوں سے ٹکرا گیا ہے۔

مقامی ذرائع ابلاغ  کے مطابق جاپان میں 'ٹائیفون نمبر 6 'کے نام سے مشہور استوائی طوفان 'جانگمی' آج بروز بدھ علی الصبح صوبہ واکایاما  کے جنوبی ساحل سے ٹکرا گیا ہے۔طوفان  کے نتیجے میں جاپان کے وسطی اور مشرقی علاقوں کے وسیع حصوں میں شدید بارشوں، تیز ہواؤں اور سیلاب کا خطرہ پیدا ہو گیا ہے۔

روزنامہ دی جاپان ٹائمز کے مطابق طوفان واکایاما کے جنوبی ساحل کو متاثر کرنے  کے بعد ملک کے بحرالکاہل کے ساحلی علاقے کے ساتھ ساتھ شمال مشرق کی جانب بڑھ گیا ہے۔

جاپان محکمہ موسمیات نے دریاؤں میں طغیانی اور سیلاب سے متاثرہ علاقوں کے لیے 5 ویں درجے کی وارننگ جاری کر دی ہے کہ جسے خطرے کا بلند ترین درجہ سمجھا جاتا ہے۔

خبروں کے مطابق صوبہ واکایاما  کے دریائے 'کوزا' کےاطراف میں  سیلاب آ نے کے بعد  حکام نے ہنگامی صورتحال کا اعلان کیا تھا لیکن  بعد میں حالات میں بہتری  کے بعد الارم کا درجہ  کم کر دیا گیا ہے۔

حکام نے شہریوں کو خبردار کیا ہے کہ دریاؤں میں طغیانی، لینڈ سلائیڈنگ اور مزید بارشوں کے باعث خطرات بدستور موجود ہیں لہٰذا احتیاطی تدابیر برقرار رکھی  جائیں۔

کیوڈو خبر ایجنسی کے مطابق جانگمی طوفان  کے اثرات جاپان کے مغربی علاقوں سے کہیں آگے تک پھیل گئے ہیں ۔ سینکڑوں پروازیں منسوخ کر دی گئیں، متعدد ریلوے سفر معطل یا تاخیر کا شکار ہوگئے  اور  مختلف صوبوں میں شہریوں کو محفوظ مقامات کی طرف منتقل ہونے کی ہدایت کی گئی ہے۔

شدید موسمی حالات کے پیش نظر بڑی صنعتی کمپنیوں نے اپنی سرگرمیاں عارضی طور پر معطل کر دی ہیں۔

ملک بھر میں چلنے والی تیز ہواؤں کے باعث دسیوں ہزار گھرانے لوڈ شیڈنگ کا سامنا کر رہے ہیں۔

ماہرینِ موسمیات نے خبردار کیا ہے کہ شدید بارشوں کا سلسلہ جمعرات تک جاری رہ سکتا ہے، جس سے مشرقی جاپان میں سیلاب اور موسم سے متعلق دیگر قدرتی آفات کے خطرات مزید بڑھ سکتے ہیں۔