بھارت کے پی این گڈگل جیولرز نے منگل کے روز 'لائٹ اسٹائل' کے نام سے سونے کا  ایک ذیلی برانڈ متعارف کرایا ہے۔

اطلاع کے مطابق ایک ایسے دور میں کہ جب سونا عام صارف کی پہنچ سے دُور ہو چکا ہے بھارت کے پی این گڈگل جولرز نے 'لائٹ اسٹائل' کے نام سے  ہلکے وزن اور کم کیرٹ کے زیورات کو متعارف کروایا ہے۔

 پونے شہر کی زیورات  و جواہرات  کمپنی 'گڈ گل' کے چیئرمین سوربھ گڈگل نے رائٹرز کے لئے انٹرویو میں کہا ہے  کہ گذشتہ چند مہینوں میں سونے کی قیمتوں میں زبردست اضافہ ہوا ہے، لیکن صارفین کے بجٹ میں اسی تناسب سے اضافہ نہیں ہوا، جس کی وجہ سے وہ کم قیمت والے نعم البدل کی تلاش میں  ہیں۔

ہلکے وزن کے زیورات کا شعبہ تیزی سے ترقی کر رہا ہے اور اس نے سالانہ تقریباً 30 فیصد کی شرح سے ترقی کی  ہے۔ گڈگل نے کہا ہےکہ کمپنی اس شعبے سے فائدہ اٹھانے کے لیے اس سال 'لائٹ اسٹائل' کے 12 اسٹورکھولے گی۔

مقامی سونے کی قیمتیں، جو پیر کے روز سے 101,078 روپے فی 10 گرام کی ریکارڈ سطح پر پہنچ گئی ہیں   2025 کے آغاز سے  اب تک 29 فیصد چَڑھ چُکی ہیں  جبکہ 2024 میں یہ اضافہ  21 فیصد تھا۔

جمعہ کے روز ایران پر اسرائیلی حملے کے بعد سونے کی قیمت 3,430 ڈالر فی اونس کی بلند ترین سطح پر پہنچ گئی ہے۔

گڈگل نے کہا ہے کہ مارچ  2026 میں ختم ہونے والے مالی سال میں آمدنی میں سالانہ 30 سے 35 فیصد اضافے کی توقع ہے اور صارفین آہستہ آہستہ زیادہ قیمتوں کو قبول کر رہے ہیں۔

انہوں نے مزید کہا  ہے کہ سونے اور چاندی میں سرمایہ کاری کے رجحان میں اضافہ ہو رہا  ہے کیونکہ دونوں دھاتیں دیگر اثاثہ جات کے مقابلے میں بہتر منافع  کی ضمانت دیتی ہیں۔