آسٹریلوی سوشل میڈیا صارفین نے آتشبازی کی ایک ویڈیو  شیئر کی اور  'اسلام پسندوں' پر الزام لگایا  ہےکہ وہ سڈنی کے ایک مضافاتی علاقے میں بونڈی بیچ فائرنگ کا جشن  منا رہے ہیں۔ تاہم حکام نے کہا ہے کہ ویڈیو  میں دِکھائی گئی آتشبازی  درحقیقت کرسمس کی تقریبات کے لیے تھی۔

یہ ویڈیو، بروز اتوار آسٹریلیا کے مشہور  ترین سرف بیچ پر ہونے والی فائرنگ کے واقعے کے بعد آن لائن ہونے والے، کئی غلط معلوماتی سلسلوں میں سے ایک ہے۔  

حکام کے مطابق بندوق بردار حملہ آور  نے  سالانہ یہودی تہوار حنوکاہ  کی  تقریب کو نشانہ بنایا، حملے کے وقت  بیچ پر ایک ہزار سے زائد افراد  جمع تھے اور  حملے کے نتیجے  میں 15 افراد ہلاک اور 42 زخمی ہو گئے ہیں۔

اشتعالی  دعوے زور پکڑرہے ہیں

واقعے سے مختصر مدت کے بعدسوشل میڈیا پر ایک ویڈیو گردش کرنے لگی جس میں رات کے وقت  آسمان پر آتشبازی دیکھی جا سکتی تھی۔ پیر کی صبح تک یہ ویڈیو بھارت، برطانیہ اور امریکا تک پھیل چکی تھی۔

ویڈیو کے ساتھ کئے گئے اظہارِ خیال میں  ایک آسٹریلوی سوشل میڈیا صارف نے سڈنی کے جنوب مغربی مضافاتی علاقے کی طرف اشارہ کیا اور کہا ہے کہ "و ہ لوگ جنہیں ہم نے اپنے ملک میں داخل ہونے دیا  اب بینک اسٹاؤن میں آتشبازی کر رہے ہیں، بونڈی میں ہمارے یہودی شہریوں کے قتل عام کا جشن منا رہے ہیں۔ پولیس انہیں گرفتار کیوں نہیں کرتی"؟

اس صارف نے  اپنی ایکس پوسٹ میں غیرانسانی  زبان استعمال کی۔ اس پوسٹ کو  750 سے زائد دفعہ  ری پوسٹ کیا گیا۔

فیس بک پر دیگر صارفین نے بھی ویڈیو میں 'اسلام پسندوں کے،حنوکاہ  تقریب پر فائرنگ کا جشن منانے کے لئے،  سڈنی میں آتشبازی کرنے کا دعویٰ کیا  ہے۔

مقامی گروپ نے الزامات کو بے بنیاد ثابت کر دیا ہے

ایک مقامی کمیونٹی تنظیم نے کہا ہے کہ "یہ حقیقت ہے کہ  اتوار کی شام کینٹربری بینک اسٹاؤن کے اطراف میں آتشبازی ہوئی لیکن یہ آتشبازی کرسمس  تقریبات کا حصّہ تھی۔

بینک اسٹاؤن کے ملحقہ مضافاتی علاقے کے پیدسٹو کے روٹری کلب نے جاری کردہ بیان میں کہا ہےکہ "آتشبازی ہمارے سالانہ کرسمس پروگرام کا حصہ تھی اور  تقریب اور آتشبازی  کا انعقاد کئی مہینے پہلے سے  طے تھا"۔

روٹری کلب نے کہا ہے کہ 'یہ آتش بازی ہر سال کی جاتی ہے اور اس کا  کسی بھی طرح بونڈی  دہشت گردانہ حملے سے کوئی  تعلق نہیں تھا"۔

واضح رہے کہ سڈنی کا جنوب مغربی مضافاتی علاقہ بینک اسٹاؤن ثقافتی اعتبار سے ملک کے متنوع ترین علاقوں میں سے ایک ہے۔ سڈنی ویب سائٹ پر دعویٰ کیا گیا ہے کہ علاقے میں 120 سے زائد قومیتوں کے رہائشی موجود ہیں  ۔یہی وجہ ہے کہ  علاقہ  بڑھتے ہوئے  ہجرت مخالف بیانیوں کا ہدف بنتا جا رہا ہے۔

علاوہ ازیں ویڈیو  شیئر کرنے والے صارفین کو کمیونٹی کے اندر سے بھی جوابات ملے جنہوں نے تصدیق کی کہ یہ ایک مقامی کرسمس تقریب تھی۔

بیلمور کے ایک صارف نے کہا ہے کہ "نفرت بھڑکانے کے لیے جان بوجھ کر غلط معلومات پھیلانا قابلِ نفرت فعل ہے۔ تمہیں شرم آنی چاہیے"۔