ترکیہ وزارتِ دفاع نے کہا ہے کہ ترک پائلٹوں اور تکنیکی ماہرین کا پہلا گروپ اگست میں برطانیہ جائے گا، جہاں وہ یوروفائٹر ٹائیفون جنگی طیاروں کی  تربیت حاصل کرنا شروع کرے گا۔

یہ تعیناتی انقرہ اور لندن کے درمیان طے کئے گئے ایک لاجسٹک اور تکنیکی معاہدے کے بعد عمل میں آ رہی ہے۔ معاہدے کا مقصد ان طیاروں کو ترک فضائیہ میں شامل کرنے کے عمل کو تیز کرنا ہے۔

ترکیہ نے اکتوبر 2025 میں 20 یوروفائٹر طیارے خریدنے کے لیے 8 ارب پاؤنڈ مالیت کا معاہدہ کیا تھا۔ یہ معاہدہ صدر رجب طیب اردوعان اور برطانیہ کے سابق وزیرِ اعظم کیئر اسٹارمر کے درمیان انقرہ میں ہونے والی ملاقات کے دوران طے پایا تھا۔

وزارتِ دفاع کے ترجمان ذکی آق تُرک نے جمعرات کو ہفتہ وار بریفنگ میں کہا  ہےکہ طے شدہ معاہدے کے تحت پرواز اور دیکھ بھال کے عملے کو ہر سال برطانیہ بھیجا جاتا رہے گا۔

اس سے قبل ایئربس ڈیفنس اینڈ اسپیسکے چیف ایگزیکٹو مائیکل شُول ہورن نے کہا تھا کہ یوروفائٹر معاہدہ ترکیہ کے ساتھ ایک طویل مدتی شراکت داری کی بنیاد رکھ سکتا ہے۔اس شراکت داری کی بدولت پیداوار میں اضافہ اور نئی ٹیکنالوجیوں کے ذریعے مزید جدید ماڈلوں کی تیاری ممکن ہو سکے گی۔

دونوں ممالک نے دفاع اور دفاعی صنعت کے شعبوں میں تعاون کو مزید وسعت دینے کے لیے ایک جامع فریم ورک معاہدے پر بھی دستخط کیے ہیں۔

یوروفائٹر ٹائیفون طیارے اس وقت پانچ یورپی ممالک  برطانیہ، جرمنی، اٹلی، اسپین اور آسٹریا  کے علاوہ خلیجی خطے کے چار ممالک سعودی عرب، عمان، کویت اور قطر  میں استعمال کیے جا رہے ہیں۔