ترکیہ کے صدر رجب طیب اردوعان نے دارالحکومت انقرہ  کے صدارتی کمپلیکس میں سوڈان کے وزیرِاعظم کامل ادریس کے ساتھ ملاقات کی ۔

ترکیہ صدارتی محکمہ اطلاعات ومواصلات  کے Nsosyalسے جاری کردہ بیان کے مطابق وزیر اعظم کامل ادریس ترکیہ کے سرکاری دورے پر ہیں۔  بدھ کے روز دونوں سربراہان نے ملاقات کی جس میں  ترکیہ۔ سوڈان تعلقات اور  علاقائی و عالمی امور پر  تبادلۂ خیال کیا گیا ہے۔

بیان کے مطابق صدر اردوعان نے کہا  ہےکہ ترکیہ ،سوڈان کی خودمختاری و علاقائی سالمیت کی مضبوط حمایت جاری رکھے گا۔ ہم، موجودہ اور آئندہ اقدامات کے ذریعے ترکیہ اور سوڈان کے باہمی تعلقات کو مزید مضبوط بنانے کا ہدف رکھتے ہیں۔

انہوں  نے مزید کہا ہے کہ انقرہ سوڈان میں جاری تنازعے کے خاتمے اور معمولاتِ زندگی  کی بحالی کے لیے کوششیں کر رہا ہے۔ علاوہ ازیں  ترکیہ، جنگ بندی کے قیام اور ایک جامع سیاسی عمل کے آغاز کے لیے سفارتی کوششوں کی بھی حمایت کرتا ہے۔

صدر اردوعان نے اس بات پر بھی زور دیا ہے کہ اس تمام عرصے میں  سوڈانی عوام کی مشکلات میں کمی کے لیے انسانی امداد بھی مزید اضافے کے ساتھ  جاری رکھی جائے گی ۔

ملاقات میں ترکیہ کے نائب صدر جیودت یلماز،  وزیرِ خارجہ خاقان فیدان،  وزیرِ توانائی و قدرتی وسائل آلپ ارسلان بائراکتار، وزیرِ زراعت و جنگلات ابراہیم یومقلی اور صدارتی  محکمہ مواصلات و اطلاعات کے سربراہ برہان الدین دوران نے  بھی شرکت کی۔